Oté
Lo gran bataye, rant Binan épi kanaye - synkyèm morso
Zistoir pou rakont dsi galé :
/ 14 novanm 2020
Zordi ankor mi domann dann mon kèr pou kossa Binan, épi kanaye, Zenn Zan kartyé Boi d’nèf Sin-Dni l’ariv in zour a bataye konm lo shien, dimansh an dimansh an dimansh-troi dimansh de ran. Poitan kartyé mi anparl azot lé pti, ankor pli pti dann tan-la ké koméla épi la lang demoun téi bate bonpé kaziman an kouran. Mé oila, mi sort bien la-ba mé moin la zamé koni kossa k’la éspassé pou fé lèv in ène konmsa rant dé marmaye kaziman voizin, kaziman kamarad dopi étan pti mé né dann dê famiy fashé.
Zordi ankor mi domann dann mon kèr pou kossa Binan, épi kanaye, Zenn Zan kartyé Boi d’nèf Sin-Dni l’ariv in zour a bataye konm lo shien, dimansh an dimansh an dimansh-troi dimansh de ran. Poitan kartyé mi anparl azot lé pti, ankor pli pti dann tan-la ké koméla épi la lang demoun téi bate bonpé kaziman an kouran. Mé oila, mi sort bien la-ba mé moin la zamé koni kossa k’la éspassé pou fé lèv in ène konmsa rant dé marmaye kaziman voizin, kaziman kamarad dopi étan pti mé né dann dê famiy fashé.
Dèrnyé foi moin la di azot kan l’ari la rantré moi d’mars la famiy kanaye la inskri son zanfan lékol Lebon dann kartyé sint-klotid é Binan li la rèst lékol Boid ‘nèf. Konm moin la di azot linspéktèr la rant dan ron si tèlman Kanaye la raplik an katriyèm vitèss lékol Boi d’Nèf. Si tèlman la diréktris avèk son mari té blijé manyé la diplomasi pou jèr in problèm konmsa : sépar lo dé marmaye an métan dé zot marmaye rant zot, fé manj azot la kantine shakinn son koté. Si tèlman ké momandoné lo dé zanfan lété viv inn koté d’lot san zamé parl inn avèk l’ot, kaziman konmsi inn té i gnor l’ot par la volonté zot famiy. Oui, tousa lé possib mé kan v’ariv lo zour sèrtifika, koman va fé ? Pars l’avé poin lo kar. Lé dé famiy l’avé poin loto-zot l’avé bien shakinn in sharète mé koman sort dann so landroi roklé pou alé Sin-dni an sharète sirtou ké souvan dé foi shomin té kass kassé. Sèl moiyinn transpor : la moto lo mari la diréktris : Monet Goiyon 250 santmète kib, in poir kaoutshou pou ansèrv l’avèrtissér.
Si tèlman ké gran matin kan lo mari la diréktriss l’ariv dovan la kaz la famiye kanaye é konm li l’avé pran binan pou komansé él’avé fé assir lo marmaye dsi lo bak lésans. M ariv la, dovan la kaz famiy Kanaye, la famiy la di : Mésyé, an parlan par réspé, fil aou, Kanaye la fine alé a pyé. Alé a pyé ? in marmaye i koné mèm pa Sin-dni. Mari la diréktriss la pik an dsandan é li la pa mète lontan pou trouv lo marmaye dann in viraz. Li l’arété épi li la amontr l’aryèr la moto é li la di : « Mont aou déyèr, nou la poin lo tan pou pèrd » Mé lo marmaye la di : « Mi mont pa pars nout dé famiy lé fashé, alor i vé pa ni voiyaz ansanm. ». Lo gramoun malin la di : « Zot i voiyaz pa ansanm, inn lé dovan moin, l’ot lé déyèr moin ! ». lo marmaye la kalkil in kou épi li la trouv lésplikasyon lété valab pou donn sa son famiy. é sirtou lo kèr téi di p li arien pou tap a pate sépa konbien kilomète.
Sé konmsa konmsa mèm tout bann marmaye i pass légzamin épi tout lo bann mètr lékol la vi ariv in drol d’ékipaz : in vyé moto monete goyon 250 santimète kib avèk in poir pou ansèrv klaksone pétaradan, in marmaye dsi lo bak, in marmaye déyèr dsi in sanblann fotèye téi rosanm bien i vyé koussin.A park sa lé shoz la bien spassé pars lo dé marmaye la gingn zot gran sèrtifika é zot té bien kontan, zot famiy galman pars l’avé poin in bonpémarmaye téi gingn légzamin konmsa… Mi rakont azot sa pou zot konprann in pé lanbyans pars zot la konpri sa la poin okin rapor avèk lo bataye moin la anparl azot dopi komansman mon zistoir. Mé sinkyèm morso la fini é samdi proshin nou va oir lo sizyèm.
Zistoir la pan kor fini-sinkyèm morso la fini.
