Samdi dèrnyé moin la anparl azot sèrtifika d’étid. Par l’fète lo gran sèrtifika, pars lo pti lété kan ou i sort kour moiyin dézyèm ané pou pass dann la klass sizyèm. Gran sèrtifika-la téi pass sa dsi lo kou katorz-kinzan. A sèt az-la bann garson lété déza in pé kosto, é bann fiy, si lété pa bon a maryé, lété pa loin. Mi rapèl traka madam la diréktis kan la rantré moi d’mars téi ariv. Lo tan, mi anparl azot-la vakans téi komans 23 désanm é la rantré téi tonm lo trwa, sansa lo kat mars. Pou kosa mi di azot sa ? Pars moin lé né lo trwa mars é lété lo zour la rantré.

Mi arète la avèk zistoir mon nésans pars mi pans inn sé zour m’a anparl sa. Pou koué ? Pa pars lété intéréssan pou d’bon, mé pars dann tan mon nésans lété in vré lavantir pou in fanm d’akoush dann la kanpagn. Mé moin la di azot, kan la rantré téi ariv, la diréktris pti lékol Boi d’Nèf té an traka. Pou kosa d’apré zot ? Pars in bonpé fiy téi gingn zot kinzan dann gran vakans épi lété pa rar inn dé lété fiyansé la rantré. Fiyansé lété maryé san tardé, kinzan troi moi épi lété kitaz lékol assiré.. Sa lété inn dévène in nafèr konmsa pou la diréktris pars sèrtifika détid téi prépar dsi dézan - la fin d’étid 1, avèk la fin d’étid-2, avèk travaye lo soir anplis, travaye la moityé bann vakans é dann tout matyèr : kalkil li, fransé li rédaksyon, dikté li ; késtyon li, istoir, zéografi, lo sink shanté patriotik, épi la zimnastik. Alor kan la diréktris téi oi la rob sansa la zip son bann zélèv la alonzé dann vakans son traka lété for.

Mèm pou bann garson pars kan téi ariv moi d’mars in pé marmaye lété fine inskri lékol Lebon, dann fon laba Sint-klotid pars la famiy téi pans lo marmaye nora zamé gingn lo gran sèrtifika dann lo pov ti lékol Boi d’Nèf. Sint-Klotid lété pli koté sa lé sir, é mésyé lebon téi débosh bann zélèv pars li té sir banna lété bien préparé pou pass légzamin. Konmsa mèm Binan la rèss Boi d’nèf épi kanaye la parti lékol Sint klotid : Binan pars son papa téi yèm bien lo mari la diréktriss, in rouz de fon konm li, é poisson Rouz té i préfèr mésyé Lebon, in moun Sint klotid, é pa rouz pou in fran mèm si li l’avé gingn lo nom poisson rouz.

Konmsa mèm lo dé marmaye la shanj lékol mé la pa shanj lontan pars la diréktris la fini par trap son pli bèl plime épi ékri lo vice-Rectèr pou di konm de koi Lebon téi inskri dann son lékol bann marmaye Boi d’Nèf é Boi d’Nèf la pa ditou dann son rosor. Linspéyktèr, mésyé Martin la parti Sint klotid oir Lebon é mèm pa in somenn apré Kanaye la rotourn lékol son kartyé. Li l’asiz san fé dé zord é d’apré sak mi koné la pa anpèsh inndé marmaye gaskone ali. Lé vré li la pa asiz koté Binan é lété déza sa pou la famiy mé kant mèm, sort Polis pou tonm gard shanpète, konm i di, la pa vréman sak i apèl in promosyon.

Troizyèm morso la fini-somenn proshène, samdi, nou va oir katriyèm.