Médame, zé Méssyé, la sossyété koze avèk mwin sé koze avèk in kouyon, mé sé o pyé d’lo mir k’i oi lo masson.

Mézami mwin la marke an-o la in kozman mi panss sa i sorte Zapon, mé mwin lé sir é sèrtin néna lo mèm dann in bonpé péi, dann in bonpé kiltir éoi sivilizassion.

Sanss prope lé sinp, arshisinple é konm mi di la pa bézoin an avoir in bak + 24 pou konprand ali. mi oi pa dolo pran in form karé dann in vaze ron, sansa in form ron dann in vaz karé : dizon li la poin in form par li mèm é sé lo vaze k’i done ali son form.

Sanss figuiré sé konm i di in n’ot afère é mwin l’apré rofléshi la dsi san trouv in solission i bote amwin pou vréman. Mi oi ladan konm i di in fakilté d’adaptassion : dann tou lé ka lo sansa in likide konm in n’ote li pran la form lo réssipyan é mi oi pa in méyère kapassité d’adaptassion. Mi koné pa kossa zot i anpanss, mé mwin lé sir si zot i rofléshi in pé-san kass zot koko-zot sar kapabe trouv in bon lésplikassion.

Alé ! An atandan, ni artrouv pli d’van sipétadyé.