Lo kapitalism rényoné dépouyé ? Sansa La Rényon volé ?

Mi rapèl kan Téréos la kapare lindistri sikriyère La Rényon, l’avé poin bonpé voi pou di toush pa, sa sé in patrimoine rényoné. Mwin la antande in pé apré di lindistri-la, sa bande zésklav épi bande zangajé la fé sa. Pèrsone la pa di bande gro propriyétère tèrien lété pou kékshoze dann patrimoine-la.

Mwin la même antande in pé, briyan sindikalist apré di toute fasson bande zouvriyé lindistri é bande plantèr l’avé poin arien pou pèrde dann in shanjman propriyétère-an kontrère toute a gagné vi ké lo laktivité i kontinyé. Inn-dé kamarade la anparl avèk rézon « lo lou dann la bèrjri »

Ni pé kante mèm dire kamarade Paul épi bande dirizan noute parti la pa lèss azot tronpé par sète afèr-la. Lé normal, zot l’avé dan la tète léspèryanss Kartyé franssé. Emmanuel Genvrin épi Trulès épi zot ékipe l’avé mète sa an sène é an mizik d’in bien gayar fasson.

Pyé doné shoval monté aprésa lo tour La SIDR l’arivé épizapré sé lo bande Score pou lo pli gran profi bande kapitalist antiyé… Astèr l’apré anparl la mize a mor Air-Austral dsi lotèl in Korsair pliské mal an poin é kissa k’i koné si domin Air-France épi son monopole i sorte pa konm lo lou dann la foré avèk déza la sinkyème kolone dan La Plass…

Mézami toussa bande problèm lé bien konpliké é i mérite in l’analize sèryé sirtou kan sanm pou mwin néna in viktime dann tousa é sé noute péi La Rényon... Kapitalism rényoné dépouyé ? Sansa La Rénion volé.