Oté

Lo kit ta bouète lorloz i bate touzour a l’èr d’La Frans

Justin / 20 avril 2018

JPEG - 43.6 ko

Somenn isi moin la parti akout in sobatkoz dsi La Rényon départman fransé. Moin la fine anparl sa sirtou pou konète kosa ni fé domin-kosa lo pèp rényoné i fé domin. Pou koué ? Pras lo pasé sé lo pasé é ni koné plizoumoins kosa li lété : dann tan l’ésklavaz, dann tan z’angazis, dann tan la kolon i éni koné zordi lokosa k’i marsh é kosa k’i marsh pa, kosa k’i klosh é kosa k’i klosh pa. Myé, bann kréol i yinm vréman z’ot péi i pass z’ot tan, 24 dsi 24 pou fé travaye z’ot tète pou kalkil koman sar nout demin.

Soir-la, dann l’anfitéat Sudel fuma, i akoz in bonpé dsi La Rényon, dsi lo pèp rényoné, dsi nout plasman dann l’érop épi dann l’oséan indien. Par moman, i pé dir in kouran d’rényonèzté téi pass an parmi l’moun té la, pou ékouté épi pou rofléshi épou trouv lo solisyon k’i fo. An tan ké rényoné avèk bann sityasion nou la ark an-o la… Kesé lo méyèr loi i pé pèrmète anou alé pli loin.

Pou kosa mi di sa ? Pars, d’apré sak demoun téi di, la loi 19 mars 1946 la fine done sak li pé doné é astèr i fo alé pli loin pou bien viv an rényoné, an fransé, an éropéin an indyanoséanien. Anpliskésa, an réstan ki ni lé, é san kont dsi baton tonton pou travèrs la rivyèr. L’èrla, mi rogard mon lèr, mi oi lé sète èr karant don k uitèr moin vin-lo tan i pass vite. Mi agard galman dsi lo lorloz l’anfitéat Sudel Fuma é kèl l’èr mi oi ? Sink èr karant don sizèr moin vin.. L’èr La Frans.

An parmi in kantité d’moun lo kèr i bate l’inison pou La Rényon, mél o kite sabouète lorloz i bat touzour à l’èr d’La Frans.