Oté

Lo kordonyé épi lo dë pti-nin-morso niméro 1

In zistoir pou rakonte dsi galé :

Justin / 19 mars 2021

JPEG - 43.6 ko

Zistoir-la i sorte, in grand vil dann péi-la. Jkonm kordonyé i paré li lété lo méyèr téi pé trouv dann tan-la dann péi-la. Pars zot la fine kon prann zistoir-la i éspass dopi in bon koup de tan-dizon dann moiyin az. L’avé solman kék pèrsone téi koné son talan é la plipar bann moun la vil téi koné pa li é zot téi i sava fé fèr zot soulyé dann bann gran magazin pars d’apré zot sak bann gran komèrs téi fé konm soulyé lété forséman pli méyèr ké sak lo pov kordonyé téi fabrik épi li téi éspoz dann son mizing komèrs.

L’avé inn foi pou inn bone foi méssyé lo foi la manz son foi èk in grinnsèl.

Donk lo pti kordonyé téi vann moinss-an-moinss soulyé é par l’fète li téi gingn moinss-an-moinss larzan é momandoné la rèst ali zis larzan pou ashté in pyèss kuir pou fé in sèl père soulyé. Li la trape lo dé-troi pyèss larzan téi rèst dann son pti sak épi li la parti oir son madam té apré rakomode son méyèr kostime.
Li la di :« Avèk larzan-la mi sava ashté in pyèss kuir-lo méyèr kuir m’a trouvé - épi m’a fé lo pli zoli soulyé fanm mwin la zamé fé é ou la zamé vi. M’a fé mon méyèr possib pars pé
s’fèr sé lo dèrnyé père soulyé m’a gingn fé. Aprésa mwin nora pi ditou larzan.

Kriké ! Kraké ! Kriké Méssyé ! Kraké Madam !

Lo madam trakassé, la rogarde ali épi la di : « Koman nou va fé pou manjé, si i rèst ar pi anou arien konm larzan ? »
Li la réponde son madam : « Mi pé pa dir aou, pars mi koné pa ditou ! »… Lo madam la mète a plère an silanss é l’avé arienk son zépol téi monte épi téi dsann tazantan, kon in moun apré plère ti-dousman… Malgré sa, lo mari la pa sédé. Li la anfil son méyèr kostime zistoman sak son madam té apré réparé, épi li la parti an vil pars zour-la lété in zour d’marshé.

Alé ! li la di son madam, ni artrouv talèr. Arivé dann marshé li la rodé par dsi rodé pou trouv lo pyèss kuir téi bote ali vréman, in pyèss kuir zoli vèye pa pou fabrik konm li téi vé, lo pli zoli soulyé son madam l’avé zamé vi é li l’avé zamé fabriké… Final de konte li la trouv lo pyèss kuir li téi rode : lo kuir té souple épi téi briye zis konm li l’avé maziné, mé toute son larzan la pass dann fèye kuir-la. Li l’ashté épi li la rotourn son kaz.

Mon zistoir pou rakonte dsi galé la pankor fini, samdi proshin zot va lir la suite si zot néna l’anvi-si lo kère vou z’an di.

La pankor fini