Dann mon jene tan moin la konète bann z’ékrivin piblik. I fo dir osi, dann tan-la, l’avé poin in bonpé d’moun téi koné fé in lète kisoi in lète pou l’administrasyon, kisoi in lète pou in partikilyé, konm in domannn an maryaz, kisoi ankor sak i pé apèl in lète d’afèr. L’avé osi in pé téi fé bann lète pou dénons d’ot moun é sa lété pa lo méyèr rol pou in l’ékrivin piblik.

Pou kosa mi di sa ? Pars in moun té kapab fé in lète téi pé amenn lo bonèr dann in kaz, mé téi pé aport lo malèr galman. L’èr-la lété bann z’ékrivin piblik ké lété vizé par d’moun. Pou kosa ? Lé sinp, pars zot tousèl i koné tras inn-dé mo dsi in papyé é anplis ké sa, konm i di dann tan, téi arondi bien la batard, fé lo plin épi lo délyé, maziskil épi miniskil. Si tèlman bien trasé ké sak téi lir té i donn l’idé d’in n’afèr vré pou vréman.

Mi souvien, in zour, dann in maryaz la famiy la maryé la gingn in lète té i di konm de koi lo nouvo maryé l’avé fé in z’anfan avèk in n’ot fiy. Mi rakont pa zot lo déga ké lète-la la fé é koman la soiré la mal spasé... Poitan sak mi ansouvien sé plito bann lète domann an maryaz, sannsa bann lète z’amouré. Sanm pou moin, lo moun té i ékri sa, zot l’avé konm dan l’idé zot téi fé ariv in gayar l’évènman. I diré, pou zot, zot l’avé z’ot par dann lo bonèr bann famiy.

Mi souvien bien dsi l’anvlop téi ékri lo kat lète : fpmb, téi vé dir fèrmé par mil bézé . Mi souvien galman, lo kor d’lète téi koman par : « je prends ma plume pour te donner de mes nouvelles qui sont bonnes » é té i fini par : « si ton kèr èm mon kèr konm mon kèr èm ton kèr, nout dé kèr féron k’in sèl épi mèm kèr »... Koman zot i trouv sa ? Mi koné pa, mé pou moin, sa lété konm lo pli zoli mo ké demoun l’avé pou ékrir é pou lir an mèm tan.

Zordi koman sa i éspas ? Mi pans pa pou toulmoun parèy, mé mi pans pa sé in pèryod fini pasé - in tan dépasé !- pars malorèzman, zordi ankor, nana plis san mil pèrsone lé pa vréman kapab fèr in modékri. L’èkrivin piblik, moin la bien konète, mé mi pans zordi la pa vréman in métyé la fine disparèt konplètman… Pou lo méyèr, konm pou lo pir.