Zot va dir amwin pou kossa mi di sa ? ébin pars sé la vérité sinploman. Bann marmaye konm bann zadilt, néna i amenn in bone vi, mé néna ossi i amenn in vi difissil.Noute toute i koné sa, mé nou na pwin la solission pou fé arète soufer sak i souf. Ni pé rogrété, défoi ni pé solman fé lo konsta san gingn aporte in bon solissyon.

Mé wala zordi ni profite bann marmaye i sava pa lékol pou mazine domin soi kan va fé sho, soi kan va fé fré é sèl konsta ni pé fèr sé ké bonpé marmaye sar dann mové kondission pou bien aprann lékol : kan va fèr sho va fèr tro sho, kan va fèr fré va fèr tro fré mèm si ni antan dir La Rényon néna in bon klima é sé lo lané skolèr k’lé mai roganizé.

Mal roganizé pars ladministrassion lé pa la avèk sa é lo kozman k’i di lo zanfan lé dann santre lédikassion sa lé pa bien vré pars sé ladministrassion k’i roganiz ali pou règ son prop problème-an fète sé èl ké lé o santre lo sistèm édikatif. Lé domaz mé lé vré noute sossyété lé birokratik é èl i vé pa shanjé kissoi in pti myète solman.

A bon antandèr salu !