Lotrozour mi sava dann in farmasi : zot i koné kan ou la fine trap in laz, sa in komèrs ou i frékant souvan. Donk mi pass dann in farmasi, mi oi in réklam pou mask : kat éro sinkant par inn, uit éro par dé, vin éro par plizyèr. Mi pans sa té bann mask an toil. Aprésa, dann télé, mi apèrsoi in moun-avèk larzan la réjyon-la fé in fabrik mask épi li konsèye vann inn po 35 santime. Kaziman in bienfétèr l’imanité !

Mi kalkil an moin-mèm kisoi an toil fason artizanal, kisoi an plastik-si la pa sa, lé konm parèye - talèr i fo in sèrtin bidzé pou in moun, sansa in famiy ékip ali. Pars zordi, i fo lo mask si ou i rant dann in lokal fèrmé, mé domin, sar dann in éstad, dann shomin, in pé partou sof pétète dann out kaz é ankor. Tout fason sé in dépans é Roland Garros avèk son min dann posh i sar pa vni sokour aou.

Pou konplète lo tablo, si i kol aou san mask, in l’amand 135 éro i atann aou. Konmsi larzan téi trouv dsou la pate shoval… Alor bann pov, kosa i pé fé ? Rèss konfiné san k’lé oblijé, sansa port bann mask périmé ?

Rozman non, pars i paré léta va donn mask bann pov. In bon n’afèr mé lé zot ? Sak lé pa pov, mé lé o flan kant mèm ? La poin solisyon pou zot. Amoins ké bann komèrsan i fé kado mask é i plish aou dsi lo pri, mé sa sé in n’afèr k’i komans fatigé sa. Pars ni vé ni vé pa, néna inn i pèye dann bout shomin é sak i pèye, li komans ète fatigé péyé.

Gratuit, ala la solisyon, mé i règ ar pa tout problèm lo mask i sava pozé :
Pars pou anshévé, moin lé sir, i sava trouv i pé partou atèr bann mask an plastik la bézoin 450 zané pou dégradé. Zot i trouv pa sa lé long épi zot i trouv pa néna asé la polisyon in pé partou, dan la natir ? L’avé di plastik i sèrv in kou i fo rèye sa dsi la kart, mé ala in produi fabriké pou in sèl izaz, inn solman. A ! la lozik, mi pans ou lé mord sou pyé tamarin.