Na poin tro lontan moin la fé in modékri dsi lo suisid bann plantèr dann l’Inn par raport lo koton OGM… Tout sak i vé, i pé alé dsi internet pou lir bann kozman la dsi. Mi souvien bien in ga-a fon pou lo OGM-la réponnn amoin si nana plantèr suisidé dann l’Inn nana osi dann La Frans… Moin la pa réponnn ali pars i intérès pa moin konpar lo nonm suisidé dann in péi par raport in n’ot… iintérès pa moin étal la dézolasyon demoun é lé rogrétab bann milti-nasyonal-konm Monsanto - i anrishi azot dsi lo kadav bann plantèr suisidé.

Konm la foir agrikol dann Paris i sort rouvèr, moin la parti rode lo nonm suisidé an parmi bann plantèr La Frans. Lo nonm moin la trouvé la kas mon moral vi k’i paré nana sisan plantèr i mète la kord shak ané dann La frans, près dé par zour. Mi vé pa anparl la rézon, dann lo détaye, mé d’apré sak moin la lir sé la dépitasyon ké la mont dsi zot kan zot la konprann zot i pé pi viv avèk z’ot métyé, zot i gingn pi pèy z’ot krédi, alé oir bann kaparèr é bann profitèr pou z’ot par, zot i kontinyé bien viv.

Mé sa l’ariv sirtou dopi ké la réform la pac (politik agrikol komine) : la siprime bann kota, l’arète fé bann éstok, épi la tras in kroi dsi lo pri garanti.. Sa i di pa zot kékshoz sa ? Sa i fé pa pans azot k’i sava siprime bann kota épi lo pri garanti dann in an solman, a partir d’2017. Zot i koné kosa i sava spasé zot ? Sak i di ni sava siport lo shok zot i tronp lo moun ! Dann La Frans bann plantèr i suisid é isi kosa i sava éspasé ? I di pa lo mèm rézon i amen lo pli souvan lo mèm rézilta. La pa vré sa ?