Zot i koné zistoir-là ? Moin lé sir zot i koné. Sa listoir in roi la domann son kouizinié fé lo méyèr kari k’nana pou li. Lo kouizinié l’ashté la lang épi la fé in kari la lang. Kan lo roi té fine ragoulé, li la domann si astèr i gingn fé lo pli mové kari k’nana. Lo boug la arfé lo mèm kari. Sa i vé dir la lang sé lo méyèr konm lo pli mové zafèr nana dsi la tèr. Mé kan la lang i bate dann radio, alor ? Kossa zot i anpans ?

In mèm zafèr la spas in foi lé konm si la spas in foi par èr pandan vinn-kat èr. Mèm si wi azout pa arien, mèm si wi rod pa koman lé shoz la spasé pou vréman, wi grossi lo zafèr, wi miltipliy ali par lo nonm foi k’i di. Alon mazine zistoir lo proféssèr la flank in klak in marmay : tout bann radio la di sa in bonpé d’foi. Wi diré lo marmay la gingn in voiyaz kalote, épi lo lamontrèr la rant in bonpé foi la prizon.

Pèrsone i asplik pa akoz lo lamontrèr la pèrd kontrol, akoz lo marmay la zir ali. La pa bézoin lésplikasion ; i sifi dir, ardir é ar-rodir konmsa i fé tourn moulin la radio. Bou di kont, linformassion i artonm konm lo zistoir dsi la lang : lo méyèr épi lo pli pir zafèr !

Justin