Mi koné pa si zot la aprann nouvèl la ? Sa i konsèrn in zardinyé amérikin. Boug-la la gingn in kansèr zordi konm i di dann in faz tèrminal é li la port son plinyt dovan in tribinal San-Fransisko é tribinal la kondane Monsanto pou pèye ali in sonm 274 milyonn dollar pars pou lo tribinal bann glifozate lété résponsab si lo zardinyé l gingn lo maladi v’alé avèk li.

Bien sir Monsanto va rolèv l’apèl é i koné zamé kèl désizyon lo tribinal d’apèl i sava pran. An tou lé ka, promyé foi in tribinal i pran in désizyon konmsa é oplis v’alé oplis demoun va oz port plint kont in miltinasyonal konmsa … Mi antan ziska isi kozman kréol dann mon trou d’zorèye. Koman in firm bien koni i pé mète poizon konmsa an sirkilasyon. An touléka la pa dann La frans i fré in n’afèr konmsa ! Pa La Rényon non pli !

Zot i kroi sa ? Zot i koné dézèrban ? Mèm dann grann sirfas i vann sa é sé monsanto la fabrik ali. Bann zardinyé i ansèrv sa dann la kour d’moun. Bann plantèr i ansèrv sa. Pou aranj l’afèr demoun i pran pa prékosyon kan zot i sèrv lo bann salté lo Monsanto. Dann sans lo van dann kontrosans lo van lo niyaz i sava épi lo van i donn rotour. L’èrla, étone pa zot si isi galman shé nou z’ot santé i sava an vakans é la maladi i pran la rolèv ébin mi sipoz zot i pé konète pou kosa zordi.

An touléka, lo méyèr prékosyon sé pa ansèv sa ! Lo méyèr prékosyon pou lo bann péi sé interdi ali ! An touléka i fo arète ali, pars i di Monsanto avèk Bayèr, d’apré sak i di, l’apré prépar mové-mové z’afèr pou l’imanité.