Pou bann zénérasion k’i vien

Mi souvien na poin tro lontan na in boug, in sèrtin mèr Sintandré, la di, i fo bril la salté dann linsinératèr. Méyèr zafèr li lavé trouvé sé mète son lizine zis koté la shapèl tamoul la-ba Boirouz Sintandré : pou li, lavé poin danzé pou la natir épi sa nora été prop vèy pa ! Pli prop la vil Sintandré, biensir mé lo légzanp la pa bon. Aprésa, lo mèm boug la di i fo pa fé sa dann son komine mé dann Sid : lo bann mèr lété dakor, mé éstèr zot la bat arièr.

Zordi ankor, bann savan i koné pa si nana in danzé pou la popilasion, si na poin, si i fo fé bann zafèr konmsa si i fo pa. Fransh vérité, zordi bann démoun i fé travay in pé zot tète lé oblizé romark kan i bril bann salté in takon produi shimik i fane dann l’èr. Néna si tèlman, i koné mèm pa si in zour va niabou trouv in bon métod pou kalkil lo risk.

Alors, soi l’himanité lé konm krab, i di néna la taye dan la tète, alors i anvoy konm l’arivé, ariv sak na pou arivé (!) soi nou la fine gingn la krintiv alors ni pran prékosion, ni mazine la tèr kan nou sar fine alé, ni sèy garanti lo méyèr vi k’i pé pou bann zénérasion k’i vien.

Justin