Matant Zélida la ékrir Justin :

Mon shèr nové, mon spès salté, rouj de fon dovan l’éternité,
Donk, d’apré sak mi oi, mésyé lo Prézidan Hollande l’avé poin tro in kont pou fé avèk La Rényon vi ké li la shoizi rès laba dan La frans, olèrk vnir isi. poitan, d’apré sak mi konpran li té pa tro itil pli k’i an fo dann Paris é li l’avé kant mèm désèrtènn shoz pou fé isi dann l’oséan indien. Dabor li té doi vnir isi La Rényon pou démine in p é bann bonb pré a pété-d’apré sak bann rouj de fon i di. Aprésa li té i doi alé rann in vizit la COI épi rann in vizit Mayotte. Mé konm touzour li la shoizi lo pli mové solisyon, pars li la, li pa la, téi shanj pa arien ditou. In drol prézidan pou vréman é zot i pé vant azot an avoir donn in kou d’pous pou mète ali an l’èr. Zot osi bann rouj de fon, zot lé for pou fé lo mové shoi. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr,
si mi konpran bien, sanm pou moin, ou i pans ou osi ou i san out kor pou ète prézidan é fé lo bon shoi. Konm di lo kont, tout demoun i san zot kor pou ranplas lo prézidan. Solman, mi pans lété pa si fasil ké sa de fé lo méyèr shoi é lo prézidan l’avé, mi pans, z’informasion pou pous ali pou prann in désizyon konmsa, épi son bann konséyé lé la pou konsèy ali. Donk, i fo réspèk son shoi pars si l’afèr l’avé, konm di li kont, tourn ankor plis o vinèg moin lé sir nora roprosh ali lo shoi ké li noré fé, si li l’avé fé lo voiyaz kant mèm...
A vré dir lo prézidan na poin in bone shans pou vréman pars li lé dan l’obligasion mète son dé pyé dann soulyé sak la pran mové-mové désizyon avan li é li la pa désid la riptir pars la pa dann son karaktèr é pa dann karaktèr son parti sosyalis. Astèr in n’afèr, si, konm in pé i prétan, li na bon solisyon, lé irzan- pou nou- li anons son solisyon, mèm dopi Paris, mé moin na la krintiv son solisyon sé plito konm k’i diré,in pansman dsi in zanm de boi, An atandan, lo mir lé dovan nou é pour sir ni sava ramas ali a plin dan la figuir. Tok ! Pran sa pou ou !

Justin