Mi souvyin, nana déza in bon pé d’moi, an avoir antann prézidan Vergès dir nora sirman in shok rant bann sak lé pou lo progré épi sak lé kont déssi la késtyonn la MCUR. Dépi tan-la, ni oi vréman li na rézon : sak lé pou mète La Rényon dann fé-klèr i défann plizanpli nout zoli Mézon bann sivilizasyon épi l’inité rényonèz, é sak lé pou lèss nout péi dann fénoir i arète pa atak ali.
Zot i rapèl koman lo lankète la s’passé é koman bann partizan la fini par gingn rézon par rapor bann z’advèrsèr nout MCUR. Sak an parmi nou i suiv la kanpagn pou zéléksyon, kisoi dann zournal, kisoi ankor dann radyo, dann télé, sansa dann rényon, i romark lo konba i kontinyé.
In pé i voudré, konm k’i dire, fé la guèr kont sa, san dir vréman sak nana dann z’ot fonn kèr la dsi.
Dann lo sobatkoz déssi Antenne, Didier Robert la fini par di, li va fèrm la MCUR toutsuit... si li gingn zéléksyon. Plé-t’a dyé k’in n’afèr konmsa i ariv pa, sinonsa lé riskab armète a nou dann fénoir, l’èr nout pèp la pankor byin sorte dan la limyèr, l’èr nout l’inité l’apré soubate pou ranforsé.
Lo mirak rényoné lé an danzé !

 Justin