I paré lo méyèr manyèr lite konte l’adikssyon-la, sé d’pa trape lo promyé sigarète, pars si wi trape in promyé sigarète — sirtou si ou lé jenn — ou sar tanté prann in dézyèm, épi final de konte ou va vni fimèr é dann la difikilté d’arète avèk sa.

Poitan dizon tout demoune sof bann intéréssan i koné bien lo tor sigarète i fé dsi la santé d’moune. I koné ziska néna sink san pèrsone mor shak ané avèk sigarète. I koné ossi momandoné in pé toute sorte maladi ou lé riskab gagné si ou lé fimèr.

Ni pé rèv in vakssin konte lo ladikssyon-la. Ni pé rèv médikaman pou lite kont la dépandanss, mé ni koné bien lo sèl romède sé la volonté mé kozé lé bon, fèr lé méyèr. Shak foi demoune néna in mani, li lé dépandan, kissoi dépandan dossik, dépandan lalkol, dépandan in pé toute zafèr.

Télé i koz èk in médssin é i domann ali pou kossa l’éta i défann pa fé sigarète-la li réponn sanm pou li, in sossyété i pé pa viv san la drog é si i interdi trafik va komanssé. Noute toute la fine rogarde bann fime dsi la prohibission lalkol ; ni koné par kèr bann fime Al-Capone é ni koné momandoné dann l’Amérik laba la fini par rononss la politik prohibission.

Koméla i propoz bann solission pou arète fimé, kissoi lakipinktir, kissoi médikaman, kissoi talèr vakssin — mé nou lé ankor loin — mèm i trète bann fimèr konmsi zot lété bann koupab é lé pa normal izol demoune dann la sossyété.

Dovan bann léfor k’i fé, ni pé souète sa i arète, mé konm i di : « la pa domin la vèye ! » é si i diminyé in pé, sar déza bien.

A bon antandèr, salu !

Justin