Mézami, ni vé ni vé pa, lo monde la shanjé. Li sar pi zamé konm lo monde nou la konu dann passé. Dovan in sityassion konmsa ni pé dir : limnité i doi pa kapitilé. An kontrèr èl i doi préparé pou in gran konba pou ansorte aèl, lo mwinss abimé possib. Paul Vèrgès i tir lo signal d’alarm dsi in shanjman konm limanité la pankor koni ziska zordi é dann lo mèm tan dsi lobligassion nou néna pou rézisté .Par rapor in shanjman konmsa.

Biensir nou lé pa in gran péi, nou lé pa in gran pèp- mé pti pèp na pwin sa konm Paul Vergès i di é shak pèp i doi rézisté, avèk son bann valèr prop, pou fèr fass in shanjman inkroiyab konm li la pankor koni ziska zordi. Si ni suiv la panssé Paul Vergès bann pèp konm la n’ote épi konm d’ote i doi propoz lo monde in schéma pou rézisté dovan in shanjman nou la pa souété, nou la pa domandé, mé lo monde l’apré inpoz sa toute l’imanité.

Paul Vergès, dann in réflèkssion li la fé issi La Rényon, la nyabou propoz La Franss in linstitission kom l’onerc pou propoz inn grann puissanss mondyal konm La Franss in métode, in program épi in léfor pou arète lo shanjman lé fine anklanshé dopi dé zané épi anpèsh limanité détruir limanité konm li la fine komanss fèr dopi bonpé d’zané.

Par l’onerc, nout kamarad la propoz in zoutiy pou suiv lo réshofman klimatik é fé avanss an mèm tan bann solissyon krédib pou k’iarète détruir lo monde, kal so mashine infernal apré pouss lo monde ziska in pwin lo rotour an aryèr sar pi possib…Pou zot solman in gran péi i pé pran an min in kékshoz konmsa ? Mi panss non.Mi panss mèm in pti péi armé d’inn fors moral inportante lé myé plassé k’in gran péi pou mète an route inn mashine pou rokonstruir.

A bon antandèr salu.