Médam, Mésyé, La sosyété koz èk moin sé koz èk in kouyon, Mé sé o pyé d’lo mir k’i oi lo bon mason. Zordi nou lé dann péi kongo-lo pti kongo, pa lo gran Zaïr, Solman oila l’afèr ! Sak provèrb-la i di i étone amoin in pé : i di lo mor na poin la boush mé si mi rogard shak ané dann simétyèr, dsi bann tonb, mi oi pti vèr lalkol, pti vèr boisson sikré, mèm la manjaye. Pou kosa i mète sa ? Sinploman pou fé an sort lo mor lé touzour bien avèk lo vivan é si li la yèm in n’afèr vivan, i donn ali sa étan mor kansréti pou in sakrifis malgash, kisoi pou in sanblani. Alor sak la di kozman-la pou li lo mor la pa bézoin arien li na poin rézon. Alé oir non ! Mi di sak mi oi dovan monzyé… Astèr pou fé ri in pé la boush in pé i di bann békèr d’klé, an tapinoir, i rant lo soir dann simityèr épi i manz, i boir. Ni vi, ni koni, an misouk-misoukant pi zot i fé plézir z’ot boush.. Alé ! Normalman lo mor na poin la boush pou vréman, mé la pa pou sa li la pa bézoin arien. Ni artrouv pli d’van. Sipétadyé.