Oté

Lo moun la vann lo dyab son lonbraz !

Justin / 17 zanvié 2020

JPEG - 43.6 ko

Mé zami, i paré in zour Grandyab la trouv in jenn boug, larzan téi mank ali é la vi lété dir pou gagné. Grandyab la di ali : « Si ou i vann amoin in n’afèr lé aou, mi donn aou in bours plin bann pyès an or é i pé pèrmète aou bien viv ziska la fin out bann zour. »
Grandyab avèk lo boug la mète a diskité. Lo boug la di Grandyab : « Konpran amoin bien GD ! Mi pé pa vann aou ni mon bra, ni mon zanm, ni mon kèr, ni mon foi, sansa mon trip pars ou i konpran bien san sa mi gingn ar pa viv. Donk gard out bours lor pou ou pars mi oi pa la solisyon dann out problèm ! ».

GD la di ali : « Mé pétète dann out pèrsone néna kékshoz i ansèrv pa arien é moin lé touzour dakor pou done aou in gro takon lor… Di amoin : « Out lonbraz i ansèrv aou pou kékshoz sa ? ». Lo ga la di, i arsanm pa son lonbraz i ansèrv ali kékshoz é li la tonm dakor li la vann son lonbraz. GD la done ali in fortine an pyès d’or.
Astèr lo boug la di : « Mi pé ashté tout sak moin la bozoin é li la parti ashté tout sak li téi vé. »

Mé oila, landroi li l’arivé, promyé zafèr demoun la romarké sé li l’avé poin lonbraz é par pèr zot la fèrm zot komèrs é la pa vouli vann ali kékshoz. Li té ankor pli maléré ké kan li lété pov… Li la rotourn oir Gd épi li la di : « Out kado lété anpoizoné sa, é moin lé ankor pli maléré. Mi rann aou out lor é ou, ou i rann amoin mon lonbraz ! ».
GD la di : « Moin lé pa in mové boug, mi vé bien rann aou out lonbraz mé an rotour ou i vann amoin out lam... »

A suiv