Oté

Lo moun la vann son lonbraz Grandyab-troizyèm morso

Justin / 21 zanvié 2020

JPEG - 43.6 ko

Mé zami, nou la fine koz ansanm zistoir lo ga la vann son l’onbraz avèk Grandyab é kan li téi pans avoir fé inn bone afèr, li l’artrouv ali san l’onbraz avèk demoun sirtou i vé pa avoir afèr avèk li. Zot i konpran bien in moun la poin l’onbraz sa la pa in moun normal é son anormalis i fé kour d’moun plito ké groupé otour d’li.

Astèr lo dyab i tant i dézyèm parad : ala ké li propoz lo boug rann son l’onbraz épi vann son l’am a la plas. Lo marmaye téi yèm si tèlman l’or ké li noré pi marsh dann la konbine mé li la konprann vitman li téi sar mète ali dann i pyèz ankor pli for.

Mé kan li la sèye rann lo dyab son l’or, sète-la la shanj an sand é so kou isi lo dyab lété san pityé-la transorm ali an zésklav ziska la finisyon son bann jour. Si ni vé tir la moral sète istoir-la, ni diré la pa sak ou i oi lo plis sé lo pli inportan, défoi sé sak o i oi lo moins i kont in bonpé : lo lonbraz avèk lo l’am, zot i konpran i diré sa la pa inportan-é poitan ni pé dir sé lo l’ésansyèl.

Mi rapèl étan lisé moin la komant in fraz téi di konmsa : « La kiltir sé sak i rèss kan ou la fine obli tout zafèr » é zot i koné la kiltir la sa lé plisk’inportan sa. Ou i oi pa li, ou i toush pali, ou i pass pa shifon dsi tablo pou éfas ali. Poitan li lé la é bien prézan é bien ésansyèl dan la pèrsonalité in moun épi dann sète in pèp.

Astèr i fo ni trouv in tik-tak pou fini avèk nout listoir. Sak ni sort oir sé solman lo troizyèm morso é katriyèm i tard pa : pétète sé li k’va fini avèk listoir « lo moun la vann son lonbraz Grandyab ».- nou va oir l’afèr san trdé, pétète n ou va mak : »suit épi fin ».

A suiv - i tard pa sar lo katriyèm morso.