In somèn pou lo kréol ? In pé va di la p’assé, in pé va di i fé tro in kont avèk sa. Sak i di la p’assé, an parmi mon bann dalon, m’a di tout lané ni viv an kréol, épi pandan in somèn, ni viv an solidarité avèk tout bann kréol lé zot péi. Sak i doi rouv zot zié, tir grin n’bibass dann zot trou d’zorèy, fé travay zot ti trépé la matièr griz.

I fo ni rann anou kont nou na la shans viv in périod révolission kiltirèl. La pa arienk nou, mé d’ot péi épi d’ot pèp kréol... Sak la plipar d’tan la komans fé an maron, la kart la zèl pou pran lo plass i mérite ali. Ti lanp ti lanp, li va vni ofisiél ! Alor, lé bon, la pa bon ?

Bien sir, in viktoir lé zamé définitif, épi dé foi, i fatig nout tété oir in pé i kapar nout kiltir pou fé marsh zot biznès. Ni rod nout pirté dann toussa, ni artrouv pa toultan. Dann in match, nana toultan bann véyèr d’kok i anprofit travay zot la pa fé. Laliénassion lé konm in rashkèr sa pou nou.
Solman, si ni pans mouvman kiltirèl, ansanm-avèk dévlopman lékonomi, défans lanvironman, la démokrasi sosial épi politik i mète anou dann shomin dévlopman dirab, ni pé di sa lé bon pou nout lavnir.

Justin