Kan prézidan la fé son dèrnyé kozman li la di konfineman i arète lo 11 mé. Mèm té la nuite nout dé la fanm la fé in dansrone dann salon. Mé kan nou la kalkil in kou, nout kontantman la fané : lo tan la konfinans téi doi dir ankor in moi. Aprésa, kan lo pti blan la kozé lété konmsi li téi koz tousèl pars, ankor in moi konmsa l’avé do koi kass nout moral.

Mé nout sirpriz lété pankor fini é sak moin l’avé pèr antann moin la antann. Kosa moin la antann d’apré zot ? Moin la antann sa tousèl pars mon gouvèrnman té apré ral son karang, fatigé par lo zanons moin la mark an-o la. Donk moin la antann la pa lo onz pou toulmoun é sak lé vyé, sak néna landikapé, sak lé frazil, sak néna la komorbidité (kosa sa i vé dir sa ?)-sré ti pa in maladi i sort larshipèl bien koni. Bon pou sa mèm, mé pou nout par ni sava zoué prolongasyon.
Dépitasyon la mont dsi moin : lo onz moin té i trouv té loin, Astèr si i dépass lo onz mon kab prinsipal va pété-mon kab la vi si zot i vé. Li la pa di anou pou koué épou kèss, li la larg anou sa konmsa, konmsi nout libèrté lété fini ariv konm in shifonn papyé. Pars laz nou lé fine trapé, n i sava pèrd ankor in an la dsi ! Moin téi koné pa si téi fo pléré, sansa kriyé, sansa an kor bate mon tète dann mir. Kosa i sava fé la ? Kosa i sava fé ankor, Zézi mari mondyé ségnèr. Shien mèg.

Oté, moin la parti dormi, mé inposib bien fèrm lo zyé, inposib larg in bon somèye, la voi Makron téi rézone dann mon tète konm in voi d’dyab avèk korn, tridan é tout lo tranbléman é li téi di : « A ! A ! konfineman i arète ? Arèteré ! Pars la pa pou bann toboz konm zot. Dizon zot i antèr l’ané konmsa mèm ! »… Mé zami si moin téi trap sa, sirman moin téi fé la bouyi sanm li. Dizon tousèl moin nora pa gagné mé nout dé la fanm oui é si té pa asé nou na in voizin lé konm nou dsi l’déklin… Alor mi oi li mal rant nout min.
Gran matin lo zour la lévé moin la sote atèr é mi di la fanm : « Ou i koné kosa lo pti blan-blan la di yèr soir ? ». El i di amoin biensir èl i koné : nout kalvèr i arète lo onz. Néni mi di aèl, pou nou i fo mète ankor in bout dési. Oui pou nou sa i arète la Sin Glinglin… El la di amoin : « sin Glin Glin sa la pa dann kalandriyé sa ! ». Moin la réponn aèl : « Makron la trouvé li ! » El la vni pal épi èl la di : « kosa ni fé lo onz ? ». Moin la réponn aèl takotak : « lo onz ni sar monte dan lé-o, lo onz nou v ‘alé la foré. Pti pa , Pti pa v ‘arivé ! » konm Ousanisava i shant.

NB Vizilans ! lo pti prézidan la di li fé pa inkéstyonn laz avèk sa, mé alon vèye ali konm lé dsi l’fé. Sé in mantèr par profésyon.