Antouléka lo mèm koz néna lo mèm zéfé é sak i lèss ali tanté lé riskab trouv ali an difikilté, mèm disparète sirtou kan i désside fé in sèl produi é kan i prévoi pa dopi lo komansman la divèrsifikassion.

Kossa mi vé anparlé d’apré zot ?

Sinploman la fabrikassion bande mask sirirzikal, in produi d’sirkonstanss, dépandan la déssizyon d’in préfé osinonsa de l’éta ki anpliss ké sa, i aplik anou in politik sanitèr i tien pa d’boute.

Na poin lontan si zot i rapèl in lantropriz produi sanitèr la tak baro, pars — li lété pa défissitèr — mé li téi fé pa assé bénéfiss. Alor lo kapitalist la désside mète in poin fina avèk sète afèr-la. Pars i fé pliss bénéfiss kan i inporte bande produi konmsa.

Biensir mi antan déza déssèrtin poz bande problèm linvèstisman zidisyé, sansa bande problèm la zéstyon, épi d’ote soz ankor… Dann la réalité lo sistèm ni viv dodan zamé li va pèrmète anou pou vnir in péi dévlopé.

Pou sak i ékoute in pé laktyalité, mi panss zot la antande lil Maurice l’apré invèsti pou rolèv lo nivo d’vi son bande zabitan ziska k’i trape in nivo d’vi élevé. Pa pars zot lé pli intélizanss ké nou ! Pa pars zot néna pliss rishèss ké nou ! Mé sinploman pars zot la fine kass lo lien kolonyal é nou non.

A bon antandèr, salu.

Justin