Bienantandi mwin lé dakor avèk zot dsi in n’afèr, sé ké dann lo famé panyé d’la ménazère néna produi méyèr marché mèm si la pa méyèr kalité, é konm toute demoune mwin lé konte sak i rann la vi shèr, mi dovré ète pou lo famé panyé.

Mé kan i shoizi 153 produi pou mète dann lo panyé, sé konmsi néna in pé i shoizi pou mwin é pou mon famiye kossa i fo mi manz donk i réspèke pa mon bann zabitide alimantèr pars dann bann zaliman néna manzé zéropéin é na poin zaliman kréol. Donk wala in manyèr shanj mon fasson manzé é sa sé kékshoz mi apréssyé pa pars sa lé konte mon kiltir kréol

Dézyèm zafèr bann manjé-la lé pa bon pou la santé… Mi koné pa par mwin-mèm mé mi lir dsi l’internet i di la pa pars in pé i fé kui dann lizine mon manzé ké li lé méyèr pou mon santé, li lé mèm pli mové pars zot i fé kui, zot i mète konsèrvatèr dodan, é mwin la pa lo bon manzé momon pou mon ropa.

Pou lé zot shoz kissoi lijyène, kissoi bann produi l’antrotien ala ankor in fasson roganiz mon manyèr viv. Mèm lo bann fasson myé viv an dépanssan mwins lo panyé li réspèke pa sa. Li obliz amwin, issi La Rényon, dann tropik viv konm bann demoune déor i viv é sa mwin lé pa pour ditou.

Donk mi di sosyalman, kiltirèlman idantitèrman, sanitèrman lo panyé la ménazère l’apré fé anou d’tor, é anpliss rononss noute kiltir épi noute sivilizassion. Normal la préféktir, lo bann sèrviss, toussa lé tayé pou rafl larzan é anpliss transform noute kiltir. In fasson fé nout l’assimilassion san ké ni rann anou konte.

A bon antandèr, salu !

Justin