Anfin lété pa sa é noute zé d’dovinète té apré tourn an ron kan inn la di : dann marshé forin o por i fé panyé garni. Koman i fé sa ? lé sinp, i paré, shak partissipèr(èz) i mète pou dé-troi éro légime,zépiss, toussala, épi kan panyé lé plin, i fé konm in pézé a léstime-mi rapèl pi si i soupèze sansa non, mé shakinn di solon li lo panyé i pèz konbien é apréssa i pèz é sak lé pli pré d’lo poi i ramass la mize. Kontan siouplé pars pou dë-troi éro li gingn o moinss karante éro légime.

L’èr-la shakinn la rapèl sak téi fé dann son marshé forin avan lo sistème i proféssyonliz : la loteri avèk konm anzé in paké poisson, in fromaz koshaon, sansa d’ote zafèr mi koné pa si néna ankor pars koméla shakinn i sava marshé forin é li lé pli pdréssé k’inn é l’ote pou li trotourn son kaz si tèlman i fé pi in ka ansanb toute zé i téi fé lontan. Pétète rant zot bande marshan i fé ankor, mé l’moune kan l’èr pou tiré lé fine arivé, li lé déza loin é li panss mèm pi lo zé.

Mézami la vi lé konmsa koméla, toulmoune lé pli préssé ké préssé, é lo tan pou amiz in pé na pi. I intérèss pi i n gayar kok shatigan, i intérèss pi in zoli paké poisson-i di mèm pi paké, i parl an kilo-i intérès pi in balotin létshi. I parl pi an san, i pal ankilo, sansa longani. In kartyé sitrouye di kap i di pi arien pèrsone. Lo tan mète in pyèss dann la min lo moune lé dan lo bézoin i pran mèm pi.Parl pi in ron kok bataye...

Nou lé tro okssidantalizé ,mèm lo tan sé larzan é sak i bonimante, bonimante ali, lo passan la pi la pou fé in konte sanm li. Lo tan zoué na pi, lo tan amizé parl pi, lo tan kass lé kui i diré koméla lé défandi.

Lavi ! La vi ! Ou lé pi la vi koméla ! A bon ékoutèr, salu !