Mi pans, kom moin zot i koné so pti modékri lo poet Prévert. Sa I komans a daté, vik sa I romont dann tan dézyèm guèr mondyal. Mé kan mi di sa, na in kélkin mi oi toutsuit lo figuir dovan moin, sé lo Prézidan la Réjyon, mésyé Didier. Fransh vérité li lé konm in paon, li fé lo fyèr, li vir li tourn, li di dann son kèr agardé moi kome zé sui bo. Tousala sé in postir ! Tousala sé in manyèr fé kroir kékshoz pou fé avans in pyon mé la pa touzour lo plan i marsh, na dé foi li kass par boute, mèm si lo pouvoir sosyalis lé la pou sèy anpar la plui pou li, protèz ali avèk zot golaz.

Nout zournal la débisk ali dopi in bon koup de tan avèk son kontinuité téritoryal, konm i di. Zourite dann danzé i larg son bouyon noir é kan ou i kroi li lé la, li fine ariv in n’ot koté. Donk li sèy fé kroir sak li défann sé lo droi kréol pou voyajé, mé la pa sa, sé solman in manyèr pou donn bann konpagni l’aviyon larzan piblik sirtou kan ou lé prézidan in konpagni i pran pou li karant pour san la kontinuité. Konmsa aprésa, ou i pé parad dann télé, pou dir la konpagni son finans lé bon.

Mé solman sa sé ankor in postir : sé sèy fé kroir lo kontrèr la vérité. Poitan in zour la vérité i trap aou é sak ou la gingn fé kroir in bon pé d’tan i kas par bout. La pa manké, mésyé Didier la donn son démisyon konm shèf Air Austral mé konm di lo kont mi domann amoin si lé pa tro tar. Lo paon i fé la rou, lo azar i fé lo rès. Kan la fine larg lo bouyon noir in foi, pétète dé, aprésa i gingn pi arlarg ankor é ou i fé karsèr aou. Fransh vérité !