Sa i rapèl amwin, in tan, kan mwin l’avé l’okazyon bate in pé karé dann l’érop l’ariv amwin pran in pé toute kalité transpor é fransh vérité mwin la apréssyé sa. Mwin la apréssyé lo train pars li té i amenn amwin vite épi loin. Li téi lèss amwin lir mon liv, sansa réviz mon kour an alan linivèrssité. Tazantan si mwin téi gingn tatane mwin téi ral mon karang ladan.

Mwin la apréssyé lo métro é souvan défoi mwin téi souète néna in métro issi La Rényon pou amenn anou vite landroi ni vé alé, san k’i ariv lakssidan.. Mwin la apréssyé lo téléférik... Mwin la ème bato é kan Paul Vergès téi anparl roganiz in transpor an bato dopi shé nou, ziska Maurice, Madégaskar épi d’ote zandroi, rienk a panss de sa téi done a mwin in l’èr d’ libèrté.

Mé konm zot i koné nou la pèrde lo tan. L’èr nou téi koz, lé z’ote téi fé. Kan lé z’ote téi avanss nou téi fé arienk rokilé mé mèm si lé tar ni pé di lé pa tro tar pou fé in rézo transpor prope plizyér modalité pou pèrmète dézanklav La Rényon an antyé pou lo bien noute toute rényoné... Tardra viendra !

A bon antandèr, salu !

Justin