Zordi mi vé rakont azot in zistoir moin la lir dann in vyé liv litératir mi rapèl pi kèl klass mé antouléka moin la bien èm zistoir-la, mèm si li lé kourt, mèm si i fé pa tro travaye nout mazinasyon. Mi éspèr bann gardien droi d’otèr i sa pa vnir rode lo pou dan mon tète pars i paré na poin tro lo droi rakont zistoir d’ot la invanté. Alé, konm i di, mi zète amoin dann lo é mouyé pou mouyé, tanpir pou lo bann kon sékans.

Mésyé, médam, la sosyété, l’avé inn foi pou inn bone foi mésyé lo foi la manz son foi èk in grinnsèl.
Donk l’avé in péïzan-in plantèr si zot i vé_ li téi apèl Martin, mé Martin-la dizon dann tan sa lété in nom komin é bonpé d’moun té i apèl konmsa. Son madam téi apèl madame Martin é lé normal vi k’lé konmsa isi épi dann d’ot landroi. Lo zanfan ? Mi pans pa zot l’avé vi ké dann lo zistoir i anparl pa.. Martin téi poz gob-pyèz si zot i vé - épi son gob téi ansèrv pou trap zoizo konm pijon ramyé, konm pèrdri, sansa tourtrèl sansa d’ot ankor. Pèrdri té rar mèm dann tan-koméla lé rar konm korn lapin - désèrtènn lé gri é zot i apèl perdri gri, d’ot lé rouz-rouz épi i apèl pèrdri rouz. Lo zour mi anparl azot la Martin la trap troi zoli pèrdri, bèl dizon konm troi pti poul é sifizaman pou trois pèrsone gingn kari anndan. Frite galman lé bien intérésan.
Donk, Martin i ramenn sa son kaz épi i di : « Mdam Martin, mi sava rode doboi é kan m’a rtourné m’alé shèrch mésyé lo kiré pou li manz avèk nou.I fé lontan nou la pa invite ali ! ». Lo madam i donn son akor é èl i sava dann son kizine pou prépar lo troi zoizo. L’èr manzé i ariv tanto, é madam martin lé bien avansé dann son kuisson. El i tourn, i rotourn, èl i atann mèm mé ni son mari, ni mésyé lo kiré i ariv. Zot lé an rotar pars sirman zot la parti la boutik pou pik in nanmto.-in kou d’sèk i di sa osi.

Kriké ! Kraké ! Kriké Mésyé ! Kraké Madam !
Madam Martin i sava dann son kizine, l’anvi goute son kuisson i pran aèl. Défoi, in l’anvi konmsa ou i gingn pa anparé - in l’anvi iréprésib. El i kass in pti pate èl i anvoye anndan. El i kass in bout zèl, èl i anvoye anndan. Pézapé, lo promyé pèrdri i komans mank lo zèl, la pate, la tète… aprésa i mank in kuis, épi in dézyèm kuis. Si tèlman lo promyé pèrdri apré z’ète antamé, lé tou rolishi. I rèss pi arien, mèm lo zi i sava avèk in krouton d’pain.
Madam Martin i rofléshi é dann son kèr èl i di : « Mi pans i fo mi sava oir mésyé lo kiré pou konfèss mon péshé la gourmandiz.lé pa bien d’ète gourman. Lé vré i di lotèl i rofiz pa gourman mé dann paradi Bondyé gourman la pa lo bienvéni. Vitman-vitman èl i dégrène in pti shaplé épi èl i domann pardon. Mé mésyé Martin épi mon pèr i ariv touzour pa. Sirman zot l’apré lèv lo koud, èl i pans. A ! si zot i lèv lo koud alé oir moin lé an dépitasyon isi, sa i marsh ar pa. Mi di mèm pétète sa va shyé sa ! Alor sé zom-la, zot i fout lo fam tousèl épi zot i obli aèl é èl fé kui pèrdri pou zot. lé zoli la ! eil i di lo poin dsi koté.
Si zot i pans sa va spass konmsa, ébin zot i fé in l’érèr pars moin sé in fanm mi siport pa dé shoz konmsa.

La pankor fini-Promyé morso la fini-dézyèm mors osé pou biento