Fransh vérité, mon bann kamarad ni viv dann in sosyété avèk in ta épi in paké provokasyon bann rish é kékshoz konmsa i pé pa tourn ron.Biensir la bourzoizi kapitalis lé bien armé é èl i pans sirman èl va gingn fé boir anou lo kalis ziska la lie.

Mi vé pa fé lo gran konésèr, mé d’apré mon bann souvnir lédikasyon ,Kalis sansa calice sa sé la koup bann prète i boir pandan la mèss.La lie, sé lo fonn boutèye ,sak i dépoz dann fon kan in boison l’apré fèrmanté.Lo vin konm zot i koné sé la soufrans , lo san vèrsé : boir lo kalis ziska la lie sé siport in soufrans ziska lo bout lo bout.

D’apré sak mi romark zordi lo pèp, sète La frans, mé galman sète La Rényon épi sète bann péi l’outromèr l’apré siport in réjime i atak z’ot lonèr dopi dé tan é dé tan, i vyol z’ot sans l’égalité, donk i mète azot dann l’obligasyon siport sak lé insiportab par raport z’ot listoir-pa la n’ote solman-, par raport z’ot valèr, par raport sak nout lédikasyon la donn anou an éritaz-final de kont sé par raport nout kiltir kont dominèr.

Néna lontan lo bann pèp l’apré siporté : la pa komans avèk Macron, la komans avèk d’ot an parmi lo sosyalis té i apèl bann pov lo bann san dan.Macron li sé lo bouké : sirman in moun i pans li doi an avoir in QI avèk troi shif, mé pou moin li konfonn lintélizans avèk la grosèr son kof for é si li parl l’intélizans la pa sirman l’intélizans lo kèr.Oplis ou lé rish oplis ou i pans ou lé intélizan, oplis ou i pans out kapasité roul demoun dann la farine lé infini…

Ni pé ankor azout pou bann rish la rishèss sé zot droi, la rézignasyon sé nout rézon pou viv-la rézon pou bann pov viv- Mé sak moin lé sir sé ké lo pèp lé ragoulé, li lé fatigé siporté é son dégré d’fatig épi d’kolèr la fine ariv in nivo n’inport kosa i pé arivé. Moin lé sir é sèrtin demoun i dor, i lèv é l’apré maziné koman i fo fé pou kas la diktatir lo mépri bann rish.Koman fé pou arète boir lo kalis ziska la lie.

Justin