Moin t’apré ékout la radyo é toudinkou moin la antann in ga apré di : « Zot la déza trouv in grèv san rovandikasyon zot ? ». Lo prézantatèr i arsanm in pé roganizatèr la réponn ali : « Dapré ou mouvman-la la poin rovandikasyon ? ». Lo boug la réponn ali : « Mi pans konmsa, sirtou i mank bann rovandikasyon i korèsponn nout sityasion isi La Rényon. ». La dsi in n’ot téléfonèr la mète son grinn sèl dan la sos épi la di : « Si ou la bien ékout lo déba dopi plizyèr somenn ou la di antann bann rovandikasyon lé valab pou la Rényon, lé valab pou la frans , lé valab pou lo mond antyé. »

L’èrla, moin la pans dann sète afèr-la néna arienk inn la rézon : sé sak i di i fo prézant bann rovandikasyon lé valab pou La Rényon. Biensir i fo bann rovandikasyon dann l’irzans pars néna in gran kantité d’moun lé dann malizé isi shé nou mé sak lé sir sé ké bann rovandikasyon dann l’irzans épi bann solisyon dirab. Mé kèl sé la diférans rant inn épi l’ot.

Inn sé in rovandikasyon l’inflasyon i manz toutsuit. L’ot i prépar l’avnir é sé sète-la i mank anou pou vréman é pa arienk zordi . In légzanp : lo san éro konsèy réjyonal. Pou ashté lésans mé na poin arienk lésans ni ansèrv konm marshandiz é si tout I rogoumant é bin lo san éro I ansèrv ar pa arien. Astèr si ni pans in pé nout réklamasyon l’otonomi énèrzétik. Lo tan l’avé poin in priz la dsi, é sa noré trouv son plas dann nout bézoin dévlopman-é sé kant mèm lo dévlopman k’i mank anou.

A ! Pou finir, moin la antann in dépité apré di i fo domann lo pèp kosa li vé é lo pèp va di. Sa in kozman mi yèm antann pars konm ni pé dir, sa in kozman i manz pa in sèl gazon do ri , é kan ou i di sa, demoun i bate la min pars i di ala in moun i pans nou lé intélians é sa sé in n’afèr i fé d’bien. Lo pè p i koné tout i sifi domann ali. Lo pèp néna bon do li koné bien li koné pa tout, mé li domann son bann zélu fé avans bann bon solisyon pou li, é pou La Rényon. Lo pèp i yèm bien i karèss ali dann son do, mé li koné bien sa la pa sifizan pou dévlop son péi.