Moin la parti bate in karé dann l’il Maurice. La pa tro orizinal sak mi sort di pars na in bonpé d’moun i sava bate karé la-ba. Biensir, mi an profite lo ka pou moin lir in pé sak nana dann zournal é mi trouv lé intérésan pars, konm di lo kont, banna la pa tro po noir - mask blan. Zot i koné sa ? Zot i koné kozman Frantz Fanon ? Ni sava pa arkoz dé sa zordi, mé sak mi vé dir sé ké banna la fine sort in pé plis ké nou dann kolonyal é zot i pass pa zot tan pass la pomad dann do bann dominèr.

Solman, kan ou i lir in pé bann zournal é kan ou i ékout in pé d’moun, ou i fini par aprann inn-dé z’afèr lé pa tro ékstra. In légzanp ? Gouvèrnman i sort déside fé bann zéléksyon vilazoiz épi la déside sa pou lo dé désanm. Konm, a s’ki paré la pa fé gran-shoz dopi sèt-an, la mète a fèr in z’afèr ni koné bien La Rényon. Inn, la déside anbosh demoun pou travay dann bann minisipalité. Dé, la déside goudrone in pé partou sirtou dann l’androi lo parti o pouvoir lé riskab ramas kou d’kongn. In n’ot afèr, moin la lir dann zournal, bann zargiman i vol in pé ba : pa pou fé konprann demoun lé sjhoz, mé pou boush in pé lo zyé bann zéléktèr. Biensir sa in n’afèr la pa bon !

Mé la pa tout z’afèr lé pa bon, pars mi sort antann dir dann télé, i sava fé in gran lésplikasyon dsi lo bidzé gouvèrnman i prézant pou 2013. Dann bann sobatkoz nora dmoun k’i konprann in bidzé. Myé ankor, va tradui lo bann déba an kréol morisien. Pars zot i koné la-ba, san pour san d’moun i koz épi i konpran bien kréol. Pou moin, sa in bon n’afèr, in manyèr fèr konmsa demoun i konpran in n’afèr, dabitid isi ni konpran pa, i pass loin an otèr dsi zot tète. Zot i konpran bidzé konsèy rézyonal, ou bien zénéral, sansa ankor bidzé bann komine. Donk, mi pans ala in poin pozitif pou banna, in légzanp a suiv, kan sé in bon légzanp.

Pars konm ni sort oir, na lo mové konm lo méyèr. Konm partou, pétète, mé pou moin, sa té in n’afèr pou ékri é pou rakonté. Ni artrouv !

Justin