Mwin la antann suivan in dékré lo promyé miniss Lecornu la done préfé-la in pé toute pouvoir l’Eta franssé néna laba suivan la loi (aout 2025) dsi la rofondassion d’Mayotte apré siklone Chido sak la pass moi d’désanm 2024.

Donk, zordi a partir é ziska l’ané 2030 in vintène létablisman piblik lé plassé sou lé zord lo Préfé dirèktoman sé li lo shèf lo park marin, lo konsèrvatoir litoral, l’ademe, l’onf, ofiss delo, météo-franss, France-travaye, l’anru, l’agence franssèz dévlopman, l’ofil, l’ofpra é tout lo tranbléman.

Néna in n’afèr li lé pa lo shèf sé lo létablisman pou la rokonstrukssion d’Mayotte alé oir sé lo prinssipal l’ofiss pou la rokonstrikssion mé finalman ladan galman sé lo préfé néna lo dèrnyé mo dann in diskission.

In sénatèr Mayotte i poz ali késtyon dsi lo délé d’in an rant la loi épi lo dékré (aout 2025-aout 2026) é li mète an doute la kapassité bann sèrviss la préféktir paré-t-il déza an difikilté dsi plizyèr prozé konm égzanp larzan l’erop la komission éropéène la arète péyé pandan in an pars té mal jéré.

Mwin pèrsonèl mi di sa konmsa mé mi panss l’administrassion franssèz lé tro konpliiké pou ète éfikass é la pa domin la vèye lo péi sar rokonstrui konm k’i fo. An atandan bann Maoré néna in viss-roi é zot i doi ansort azot avèk sa-tanka la déssantralizassion, pou mwin, sa sé in tap-a-l’èye é pa plss ké sa.

A bon antandèr salu !

Justin