Souvan dé foi, mi louk in pé lo moun l’apré fé mète l’ésans sansa gazoil dann zot kok loto. In pé i fé konmsi rien n’été. Na in pé lé trakasé a-blok : ou i san zot l’apré domandé si avèk sak zot i mète dann rézèrvoir zot sar kapab roul la somenn plin. I diré, zot i sava stasyon, konm bèf i sava l’abatoir.

Lé fasil pou konprann pou kosa. Pars lo pri la bien goumanté ; dépi promyé févriyé, l’ésans i kout in éro sinkant-troi lo lite. Gazoil i kout in éro disète armète èk sa in boutèy lo gaz la fine ariv vin-té-in éro karann-troi santime. Sé dir si in pé d’moun lé trakassé, pars zot lé blijé fé so dépans-la. Épi la kaz, na pi d’ot tik-tak pou kui manzé kéboutèy lo gaz.

An plis ké sa kan ou i ékout l’aktyalité, ou i konpran lo pri i sava goumant ankor, pars i shof dann péi z’arab. Lo pri baril pétrol i goumant donk forsé lo pri bann produi pétrolyé va goumanté. Sa lé bien vré sa ? Sansa solman in pé vré ? Pars d’apré sak moin la tandi, lé pa fasil konprann koman i kalkil lo pri bann produi pétrolyé. Lé pa fasil, pars lé pa klèr ditou. Sèl shoz i koné sé k’bann pétrolyé i gonf zot pla é bien konm i fo, é la Préfèktir lé bien konplézan avèk zot… pa avèk nou bann ti kolon konsomatèr ;

É, konm di lo kont, moins lé klèr, plis lé troub, plis in pé i ranpli zot posh, é lé zot i vide sète zot. Konm di lo kont, é sa lé bien koni : "Rokin i shass dann lo d’mèr sal".

 Justin