Oté

Lo pri léssans ! lo pri lo gaz ! lo pri gazoil ! Sa sé pou foute anou d’dan dsi lo lon tèrm.

Justin / 2 févrié 2021

Kan i ariv shak fin d’moi, néna touzour in nouvèl dsi lo pri léssans, gazoile épi lo gaz pars sé konmsa, lo pri i shanj in foi par moi. Bon nouvèl mové nouvèl ?Dé foi oui, défoi non pars tazantan i goumant in pti pé tazantan i diminyé in pti pé. L’èr-la in pé i sava vite léstasyon pou fé in plin, d’ot koméla sa i fé azot ni sho, ni froi.

JPEG - 43.6 ko

Alon kalkil in l’anons i pé mète lo moun dann tout zot éta touzour an réstan dann mèm kréno. Mi pans mwin la trouvé : in l’anons i di konmsa na pi léssans ditou .Na poin bato pou amenn lésans.Bann pui pétrol i fourni ziss assé pou fé la guèr é pi ditou pou bann transpor pasifik. La mwin lé sir sa in nouvèl lé riskab fé bouz in pé.
Mé alon réfléshi in pé :nou la bézoin lésanss pou déplassé nou ?Mi panss ké non, parss lénèrji sa sé in n’afèr néna partou é an kantité.Lénèrzi solèye, lénèrzi lo van, lénèrzi la mèr, lo gaz i tir dann fimyé,l’éthanol i tir dann kann, lénèrzi tèrmik é d’ot zafèr ankor...Kossa Paul Vergès téi di, kossa li téi vé ? Lotonomi énèrzétik é son plan té o poin pou trap sa mé bann déstriktèr la fou tout anlèr.
Alor mi domann si i fo i anonss la find’lo pétrol pou nou réazir sansa si shak fin d’moi va anons anou konm in litani si lo pri bann produi pétrolyé la monté ou la dsann. Akoz nou va sousyé d’sa ? Ni s’anfout sa nou ! Pars nou na poin pétrol, pars nou néna d’ot shoz é pars ni pé viv avèk d’ot shoz ké so bann produi i pi mové, i vide nout porte-moné é anpliss i anrishi demoun ni koné mèm pa. Sèl zafèrn nou néna la raz pars in pé la kass lo plan Vèrgès pou lotonomi énèrzétik, in plan lété kapab bien fé avanss anou dan la vi.