Pars lé tro fassil dir la pa mwin l’otèr sé lé l’ot. La pa mwin la déklansh la guèr sé l’ote… Gouvèrné sé prévoir kant mèm é si wi prévoi pa sa i vé dir wi gouvèrn pa, sansa wi gouvèrn mal… Fransh vérité ni koné lantouraz losséan indien sé in zone tanpète é ni vé ni vé pa, i fo tienbo kont konm i konvien é pa solman pou gonf lo pla in minorité sèr sintir la mazorité.

Mi sorte ékout télé é demoune-déssèrtin sak néna la mémoir — la domann lo linvité pou kossa la pa tienbo kont plito ké bann zénèrzi fossil tout kalité sours lénèrji prop nou néna sir plass. Biensir la réponss té pa klèr pou vréman mé avèk in pé d’mémoir ni koné sak la ranplass Paul la mète anou dsi in mové shomin é pa dsi l’shomin k’i falé.

Mé toussa i vé pa dir i fo kontinyé plime kréol, i fo kontinyé pèz dsi nout porte-moné san rode solission pou ranplassé. Lé sirman possib trouv solission pou soulaz in pé nout doulèr é dayèr nout parti i propoz ankor bon solission pou nou. Biensir i parl lo shèk énèrji, karbiran plantèr, karbiran péshèr épi d’ote katégori mé léfé lé limité é la préssion lé plizanpli for.

A bon antandèr salu !

Justin