Mi sorte lir dann in zournal, nana in komité – les amis de la terre – i donn lo pri Pinokio, bann moun, sansa bann péi, bann l’asosyasyon i anparl toultan dévlopman dirab é par l’fète i dévir lo do avèk. Ni pé dir, sa in vré kassaz lé kui, mé dizon sa lé byin bon... Pars lé vré, mète "dirab" dann toute z’afèr lé pa dirab, i pé mèm dir, konm bann z’onm de loi i di, sé fèr in "fo é izaz dé fo".
In légzanp ? Nana tro pou di, mé ni pé kant mèm dénons inn-dé z’afèr... Par ébzanp, kan i déside fé in santral éléktrik k’i marsh o fuèl o Port, plito profite l’okazyon pou dévlop ankor plis bann l’énèrzi prop sé dévir lo do avèk dévlopman dirab. Kan i di partou, l’éstrésité prop i gingn ar pa dépass la moityé lo total l’éléstrisité ni ansèrv, konm in pé i di, sé plante in kouto dann do l’otonomi énèrzétik...
Mèm shoz kan ou i an apèrsoi déssètènn koléktivité, i fé pa aryin pou ékonomiz l’énèrzi : kan ou i pass dan la nuite koté in éstade é ou i oi la limyèr, bèl-bèl limyèr, i pète an flèr pou aryin ditou, pou pèrsone, pars na poin pèrsone l’apré antréné, ni zoué matsh, ou i doi domann, dann out kèr, kossa sa i ansèrv....
L’èr-la, ou i pé dir, in pé nana lo dévlopman dirab de boush, mé de boush solman, pars an vérité, zot i s’anfout sa !... Donkalor, si l’avé moiyin, n’ar été bon donn azot tazantan, lo pri Pinokyo.

Justin