Mé oila, Cuba sé in péi bien avansé dsi lo poinnvizé la santé é li néna in pouvoir for.Si tèlman zot la nyabou anpèsh lo virus instal ali an mètr : laba néna vaccin, néna trètman tousala, néna médsin pou fé lo soin, néna bann soignan. Mé kan bann vakansyé l’arivé, la fé la fète, lé normal ,é konm dann l’amérik la pandémie i done paké, bann zégzilé l’amenn la maladi avèk zot é Cuba son tour la konète la maladi.
Vakans la fini é bann vakansyé la rotourn dann l’amérik. L’èr-la gouvèrnman la déside azir kont la pandémie é pou sa la konfine lo moun, la vacciné pars laba néna kat vaccin kont la pandémie, la trété ossi pars néna médikaman banna la invanté, lé aprpré soign demoun é zot va gingn fèr... Lo péi va nyabou zigil lo pandémie, mé mi diré pa parèye pou bann zébgzilé la rotourn dann l’amérik. Mèm si zot i artourn laba pou travaye. :zot va vacciné, va sèye trété, mé la maladi lé ankor loin pou bate atèr.
Kèl ansègnman ni tir ladsi :inn kan in moun i vien an vakanss kont pa dsi li pou out zèst baryèr, pou out karantène- li la pa vni pou sa é la pa sa li sava fé. Li sava fé la fète in poin sé tou. Bann rézon inpèryèz ?Alé dormi, rézon frodilèz li va trouvé é mi di sa mèm si mwin néna konfyanss dan l’om. Alor , sak i di i falé pa lèss demoun rantré zot l’avé mil foi rézon, é bann tète fromaz mil foi tor. Alon méfyé bann moun i vé nout bien pliské nou. An touléka ni pé rapèl kozman-la, pars sé la vérité umène : lo prinsip vakans sé la vakanss bann prinsip oila pou kossa nou lé dann train-la zordi.