Al Gore, in l’ansien vice-prézidan Lamérik, la gingn lo Prix Nobel la Paix pou sak li fé pou amélior la défans lanvironeman. Li la partaz lo Prix avèk in bann z’ékspèr l’ONU. Lé bien ! Konm sa va ankouraz bann gouvèrnman fé avans in pé lo mouvman pou diminié bann gaz à effet de serre.
Lé bien, sof ke Al Gore lété vice-prézidan kan Lamérik la rofiz protokol Kyoto. Sof ké nou la pa antann bann kador parti démokrat bate tanbour la-dsi, épi lo prézidan Bush la di, sa i shanjra pa arien dann la politik Lamérik.

Pli pir, nou la antann Hilary Clinton, sak nana in shans ranplas Bush konm prézidan, félisit bann plantèr i transform zot rékolt mayi an lésans pou loto, di azot ; "la pa sé, mète ankor, sa in modèl pou bann z’agrikiltèr z’amérikin !". Modèl ? Mèm si sa i détrui la tèr vèy pa koman, épi si lé riskab fé mor ankor plis demoun avèk la faim ?
Alor, kont pa dsi moin pou bat tro la min, mi aspèr solman lo zour lo pèp Lamérik i désid kapote bann moun lé kont la natir, épi sak i fé sanblan zot lé pour. Zour-la, m’a bate la min ! Pou zordi, mi dbout-guèt sinploman.

Justin