Sak i fé ke nou lé dépasé ; moin té fine viv in épok la Rényon bann rout, loto, radio, tourn-disk tout lariv ansanm, minm la télé la pa amizé, san konté kouran élestrik ; konmsa minm lorkest bal samdi swar lé mor, bin oui, ék in tourndisk ti giny organiz in surpriz parti, fé dans tou le vilaz ; sa la du èt in gran boulversman pou nout paran !

Zordi, sak i anvayi a nou sé lo téléfone portab, lo taktil ; prèsk toulmoun na son ti lékran, li la pi bézoin la mont, pi bézoin révèy, pi bezoin asèt laparey foto, minm lo kaméra –le sipèr 8 a ou, lo kaméskop a ou, tousala pi bézoin, maniétofone, maniétoskop, talèr tout out bann kasèt oui giny pi rogardé ; laparey la pi dann magazin !
Lo téléfone portab i fé tout : la mont, lo révey, li tir foto, li film ziska ; in klé USB, inn ti zafèr pa pli grok mon ti doi, li anrozist in paké zimaz, sinéma, la mizik, konversasyon.
Esey suiv, sinon ou sar dépasé.
Bon sign ou mové sign.
Sak i giny manié lé bon …

Mé minm not zabitid viv ansanm i sanz, fé tatansyon ; lé tro fasil si tout do moun i vé prann foto, film, ninport kan, ninport koman.
Lot swar, moin la po rogard in léspéktak dan lo téat ma vil, travay marmay lékol, santé, koral, plizir zétablisman.
Promié kou, in fanm in ran dovan moin, lisort son ti lékran, li film ; li lèv son téléfone ; i bous tout la sèn ! A moin blizé di a èl : « madame, moin la pa ni war out lékran ! »
An finn swaré, rebelot, dé ran pli dvan, in bononm, a li pli zoli, son gran tablèt ; blizé rapèl a li a lord : « ti lèv ton tablèt ziskakan ? »
La téknik i ran lo moun mal élvé !Lo droi pran la foto out marmay, dakor ! E lo devoir réspèk out konsitoyin !
Lo progrè téknik i doi pa dépas a nou !

Justin