Moin la fine dir azot samdi moin lété dann in gran rényon dsi la pé. Moin la fine dir azot galman moin la antann dé shoz bien intérésan dann kozman désèrtin moun i koné sak zot i di. Solman, mèm dan la boush bann moun konmsa i di tazantan dé shoz lé pa konform avèk la vérité.

Sa lé vré, souvan dé foi dsi la késtyonn Mayotte… In moun nana in bone konésans dsi l’oséan indien vi ké li la okip in bann fonksyon inportan dann la politik la Rényon, La frans é mèm dann la kopérasyon. Donk log a la di, pou li, la késtyonn Mayotte i rogard pa La frans, i rogard pa La Répiblik Komor, i rogard Mayotte épi bann maoré.

Poitan, ni koné bien koman la Frans l’arash Mayotte dann la min bann zil komor. Ni koné bien sou Giscard-moi d’désanm 1974- la roganiz in référandome pou donn l’indépandans bannzi komor lété dann tan in koloni fransèz. Ni koné mèm lo sèl sirkonskripsyon éléktoral : Grann komor, Anjouan, Mohéli épi Mayotte. Ni koné osi lo rézilta plis 90 % pou l’indépandans. Nana arienk Mayotte la vote kont é lété bien di, sé lo rézilta global k’i kont.

Kosa l’arivé ? Lo prézidan Abdallah la proklam l’indépandans son péi avèk lo kat konpozant. Kosa La Frans la fé ? La détash Mayotte épi li la pran tout lo mézir militèr k’i fo pou fé rès lé Komor trankil… Ni koné sé in vyolasyon lo droi intèrnasyonal plizyèr foi kondané par l’onu. Alor tout démokrat kan li koz dsi problèm-la, i fo pa li gnor sak la spasé é sa i doi rant kant mèm dann son kozman kan li koz an piblik. Sirtou pou in moun i koné son n’afèr !