Mi pans pa in moun i pé dir amoin i la pankor gingn in kozman la, sansa si li la pankor sort kozman la pou in n’ot pèrsone. Sa sé in n’afèr i trouv in pé dann tout lang. In l’égzanp : dann la lang fransèz va dir aou si ou na poin la tète, l’èr la i fo ou i kont dsi out janm. I ariv tout demoun pèrd lo tan afors pa kalkil avan fé in n’afèr. Sak mi di la pa vré pou toulmoun pars nana in pé i réfléshi in bonpé avan fé kékshoz. Solman zot i koné, dann in démarsh, sansa in projé, lé pa posib prévoir tout z’afèr. Astèr zot i koné, nou kréol koman ni lé ? Ni fons pou fé pli vite é sé l’èr ni pèrd plis lo tan. Alé ! Mi lèss azot kass z’ot koko la dsi é ni artrouv pli d’van sipétadyé.