Mi sort lir dann zournal, madame Roselyne Bachelot i sort dir èl i arèt fé la politik konm ziska zordi. In l’égzanp ? El i prézant ar pa dovan bann z’éléktèr pou ronouvèl son manda dépité. Mi trouv lé in pé tar, sansa in pé bonèr, pars èl sar minis ziska moi d’mé sèt ané. Apré z’éléksyon, va désidé.
Zistoman, son shanpyon i san in pé l’aye sé tan isi. Li la pa lo favori dann sondaz. Partou ousa li pas, li port la movèz shans. Mèm li komans kalkil kosa li va fé apré lo préavi bann z’éléktèr i done ali. Dann in ka konmsa, ou i kont out bann z’amiz, é kan ou i oi in fidèl i tourn lo do avèk ou, sa i fé pa plézir. Mi pans a lo kozman madam Bachelot la dig-dig lo pyé lo prézidan pou aport ali in plézir.
Mi diré sa i rapèl amoin z’istoir lo ra... Zot i koné, lo ra, d’apré sak demoun i di, sa in z’animo intélizans. La prèv ? Alé ésèy élimine bébèt-la dann out kour si ou i gingn... Donk moin la t’andi dir, kan in bato i fé nofraz, lo ra i kite lo bato, pars an promyé li konpran na in n’afèr i klosh pa. Mi pans kozman-la i kol bien avèk madam Bachelot, minis prézidan Sarkozy, a-titré dépi 2007 ziska zordi. Zordi lo ra i kite lo bato !

NB : Madam-la la di, si Sarkozy lé éli, Èl va aksèp inn-dé misyon si li vé done aèl. Kont dési, mé fyé pa tro, pars Sarkozy li mèm lé dan lo vir-vir ; li la pèr bann z’éléktèr i anvoy ali dingué.

 Justin