Pou byin analiz in sitiasyon, kiswa in sitiasyon politik kiswa in sitisyon pérsonèl ousinonsa pou pran in désizion inportan, odrémié pran lo tan akouté, réfléshi, diskité èk domoun. Sa in loson bann vié lontan, banna té i di « fo touzour pèz lo pour é lo kont pou fé out lopinyon par ou minm ». Poukoué mi koz konm sa ? Mi vé rovni inn ti néstan si la grèss. Zordi dé sominm apré zéléksyon laba an grèss, èk tout sak mwin la vi, tou sak mwin la antann, mi di, boudikont fo tir shapo pou bann grèk, pou sak zot la fé, konm di Morisyin fo tir shapo dé fwa minm.

Banna la ryin domandé, pétèt zot la ryin fé pou sa, poitan zot i sibi. Ala in pép té toufé èk la dèt, lé touzou toufé vik i dwa 300 miliard i prétan, sak i di pa, sék té i dwa 120 milliard avan la kris, sé la politik méné pandan la kriss, la polititik lostérité kla goumant tout. In to d’somaz rant 25 é 30 pour san, apopré konm nou la rènyon, lo salèr d’moun tré ba, atèr minm, èk inn ti ginn la rotrèt, èk in sharèt lisansiman vèy pa koman, bann fanm dé ménaz la gouté, èk tousala zannwiman banna la trouv la forss pou résisté, pou di non a lostérité. Fo tir shapo.

Pou lèr, la grèss son tousèl i margongn dann lorop. Mi trouv néna bokou d’rosanblans rant nout sitiasyon sosial èk sat la grèss, si somaz, si la rotrèt, si ti salèr, si somaz sirtou. I rèt a nou solman pou byin èt dan lo lanbians èk banna, i rèt a nou fé lo rasanbloman konm zot, ryink lo rasanbloman pou pèyé. Rogard bann grèk, an sinkan i prétan lo parti Siryza la pass de sink pour san ziska tan pran lo pouvwar zordi. Ti lanp-ti lanp banna la rogroup a zot dann in parti, Syriza la pran tout an min, ala lo rézilta zordi. Di moman knou lé ini, nou lé rorganizé, nou lé rasanblé, nou lé an lèr !