Zordi présk’in sominn apré, kan ni pran lo tan rogard otour d’nou, kan ni ékout zaktialité, sad isi, sad déor, sirtou apré sak ni vyin d’sibir, èk tou sak nou la pran bitanblan konm sa toudinkou dan nout figir, mwin sink ni touf avèk télman té violan, télman shagrin té for, si tan télman nou té an doulèr dovan nout télé shakinn. Mé sak nou la viv minm si té dir, té ryin par rapor sak bann famy viktim la viv. Gouvérman va sirman rant an par mi sipoz é déza zot la byin rann omaz banna sanm pou mwin.

Boudikont zordi firamézir kan mi réaliz, mi di an mwin minm pétèt nout manièr d’viv, nout viv ansanm konm ni di touzour, pétèt sé sak va sov a nou isi dan nout péi. Mi di pa isi, na pwin ryin pou ariv a nou vik nou lé lwin, donkalor anon dor trankil si nout zoryé, ousinonsa i pé pa an awar in mové kaloubadia in zour, mi di pa sa ditou, ni pé pa konèt, mé sanm pou mwin konm ni viv isi, ni viv pa an kashièt domoun boudikont, ni koné préské tounné-viré toul moun, ni réspèk zopinyon linn a lot, ni rèspèk la rolizion shakinn.

Sétaki i pratik son rolizion konm li vé, son manièr, kiswa pou bann krétyin i sava légliz, ousinonsa pou bann tamoul i sava o tamp ou ankor mizilman i sava la moské ? Na pwin ryin pou rodir, minm si shakinn na son mo pou di, touléka nout manièr d’viv lé rokoni in pé partou konméla. Pétèt minm ni pé ansèrv modèl pou désértin. Sak lé fézab pou nou i pé èt fézab pou lé zot. Solman, krwa pa i fé sa an in zour, pran lo tan mé lé fézab mi di a zot. Sirtou argard pa lin a lot an ki bèf é souvyin a zot, vié kréol i di « lo réspé té fé avan nou »