Inn apré l’ot, bann kandida pou zéléksyon prézidansyèl i pass isi La Rényon. Zot i vien pou shèrché sansa zot i vien pou aporté. Si zot i vien pou shèrché, ni pé dir zot la bézoin inn-dé z’idé pou z’ot program pou l’outre-mèr a komansé par La Rényon ! Si zot i vien pou aporté, ni pé dir zot nana solisyon pou l’outre-mèr é pou La Rényon donk zot i vien anons anou sa isi !

Pou réponn lo dé késtyon i fodré zot i konpran vréman sak i éspas dann l’outre-mèr donk sak i éspas La Rényon. Kisoi pou rode lo bann solisyon, kisoi pou aport inn-dé solisyon, i fo zot i konpran bien sak i spass Isi konm dann lé z’ot péi l’outre-mèr poitan lé pa posib pars zot i konpran a pène sak i éspas é z’ot konséyèr i oi pa tro klèr par zot mèm.

Donk, si konm mi di, lo bann kandida i konpran a pène sak i éspas dann l’outre-mèr dsi lo késtyon sosyal, kiltirèl, ékonomik, anvironemantal zot i pé pa aport bann vré solisyon é zot i pé pa konprann lo vré mésaz l’outremèr. Dan sé kondisyon, zot i pé fé pass in sinp mésaz éléktoral pa in vré mésaz politik.

Mi souvien kan l’ané 2012 Mélanchon la fé in gran rényon dann Por. Sanm pou moin boug-la la di lo sèl mésaz intélizan k’i n kandida i pé dir : li la di, li sava pa dir anou kosa i fo fèr pou La Rényon pars ni koné myé ké li sak nana pou fèr isi shé nou.

Mi koné pa si li lété sinsèr pou vréman, mé sak mi koné sé ké son romark té intélizan san pour san. Pou kosa ? Pars si nana demoun pou trouv la solisyon bann péi l’outre-mèr sé d’moun l’outre-mèr. Si nana demoun pou trouv la solisyon bann problèm rényoné sé bann rényoné zot mèm.

Lo rès sé la prétansyon é l’orgèy, sé la blag é bann kozman la boush rouvèr.