Mésyé lo zournalis, moin la antann aou mèrkrodi apré midi apré di in n’afèr san k’ou i poz aou késtyon, sak k’ou i rofléshi par raport lo sans kozman ou l’apré di. Kosa ou té apré di ozis ? Ou té apré di gouvèrnman larsipèl komor par la boush son minis l’intèryèr la pa vouli lèss demoun débarké dann l’il Anjouan.

Kosa l’avé spasé par l’fète ? Sinploman in bann moun té i sort Anjouan la débark dann Mayotte dann z’ot kanote kwasa-kwasa. Gouvèrnman La Frans la désid zot téi pé pa fé konmsa pars zot l’avé poin lo viza k’i fo pou débark dann in téritoir « fransé ». Donk la loué dë bato pou ramenn bann moun dann l’il Anjouan.

Kan zot l’ariv pou akosté Anjouan, gouvèrnman komor laté pa dakor pars pou li Mayotte i apartien bann Komor. Sinploman pars l’ané 1974-75 gouvèrman fransé l’avé fé konm in kou d’éta pou sépar Mayotte avèk bannzil komor.

Kisa néna rézon la-dan é kisa néna tor ? Pou moin gouvèrnman fransé la fé in kou d’fors épi la déréspèk lo droi intèrnasyonal é dopi tout lo tan la éspasé dopi plis karant z’ané ! Li la mèm pa sèye trouv in térin d’antant é an pliské sa li la pa inkyété si in gran kantité d’moun la noiyé.

Mésyé lo zournalis, la rézon lo pli for lé touzour lo pli bon é tanpi si kabri i manz salad. Mé i koutré pa ou pli shèr d’fé travaye in pé out koko. Kan ou i ariv pi mète l’ord dann out dézord kisa i sava pou ède aou ?