Moin nana in kamarad, dizon in frèr vik nou la grandi ansanm. Solman li, li sré plito in manèv lo prêt ; tandiské moin avèk lo prêt, moin zis-zis, tro i rolash. Donkalor, mon kamarad - i yèm zoué dan la filozofi-li - i di amoin na poin diférans rant in rish épi in pti kolon. In pé plis, mi tonm fèb.

Apré, mi di ali akoz mi pans li l’apré farsé : « Alé di sa out madam, piské sé èl i fé komision out kaz ! ». Ala k’li rovir amoin, son madam lé dakor avèk li. Dann mon kèr, mi mazine koman i fo koz èk in moun la pa invant zèf bouyi, épi mi di ali : « Ou yèm kas in biyé sinkant éro ou ? - li fé non ansanm la tèt - é bin, mi pé dir aou, in rish i kas in biyé sinksan éro konm si dé rien n’été. Biyé vin éro-la, dizon sa piès zone pou li. Sa i sava dann boite madam Chirac. Oui mon vié fra ! Mi an apèrsoi konm in niaz i pass dann son zié... Épi, mi di aou, d’si déssèrtin késtion, rish sanm pti kolon i konpran pa inn-a-l’ot ».

Alor, mon kamarad ti-kolon, konm li kroi pa tro sak mi di, i kalkil in pé, épi i larg amoin : « I fo mi koz èk lo pèr la-dsi ! ». Mi di ali soman : « Site pa mon nom sanm lo pèr ! Zordi konm domin, mi pé an aoir bézoin ! ».

Justin