L’avé inn foi, pou nn bone foi, mésyé lo foi, la manz son foi avèk in grinnsèl.
Donk lo troizyè garson na poinn zidé pou négosyé zon l’éritaz. Sèl zafèr li koné fèr sé mont dsi son pyé d’sriz épi kass ban frui pou li manzé. In atin, i la konm anvi rafréshi son boush. Donk li mont dsi lo pyé d’boi épi li komana manzé. In ronar i ariv sou lo pyé épi i domann ali : « é pti bononm kosa ou I fé an - la ? ». Lo pti bononm i réponn : « Ou i oi pa moin l’apré manj sriz ? ou i pans sa i arnj ré out boush aou osi ? ». Ronar i di oui, é lo marmaye i kass in bon pti pé sriz pou lo zanimo. Apré li dsann li done sa Ronar. Sète-la i manz in pé apré li anbal lo frui dan in gran fèye éoi li sava. Lo marmaye i trouv bizar sak Ronar i fé, mé li kass a plis la tète ké sa pou sète afèr-la.

Kriké ! Kraké ! Kriké Mésyé ! Kraké Madam !
Mézami, zot i koné ronar la sa in zanimo monstré sa, in zanimo malin vèye pa koman. Kèl sé son lidé dann son tète, d’apré zot. Par l’fète li vé rékonpans lo marmaye la done ali sriz é oila koman li sava fé.
Dann landroi l’avé in ségnèr. Ségnèr-la té i rèss dann in shato é li lété rish vèye pa koman. Avèk son paké bien antortiyé dann fèye, li sava ziska la port lo shato. Li ral dsi in léspèss klosh é bana i rouv la port pou li. In gardien i domann ali : « Kosa ou i vé, zanimo d’malèr ? ». Ronar i réponn li l’amenn sriz pou lo ségnèr. L’èr-la i lés sali rantré épi li sava port sroiz pou lo ségnèr. Ségnèr i trouv sa bon éli domann : « Ousa ou la gingn sa ou ? ». Ronar i réponn : « Sé mon mètre, lo marki dé Karaba k’i anvoye amoin aport sa pou ou ! ». Lo ségnèr kontan i done in pti paké pyèss l’or pou lo marki é Ronar i sava amenn lo kado pou lo marmaye. Lo marmaye i romèrsyé Ronar pou sak li la gagné avèk lo ségnèr.
Ronar lé flté é li désid ou de bon ède lo jenn marmaye pou vréman, pars pou li marmaye-la i mérite pou vréman k’i ède ali.

Katriyèm morso lé tèrminé - Mé listoir la pankor fini. Li va pass dann zoinal mèrkrodi 29 zilyé-épi samdi 2 aout sar lo sinkyèm morso