Mésyé zé Médam, la sosyété, mi pans konm moin kan zot lété pti zot lavé la shans zot famiy la rakont azot zistoir. Sa sé in bon n’afèr, sa, rakont zistoir bann zanfan, in fason aprann la vi, in fason gingn somèye avèk zistoir ranpli dann koko é pétète konm moin lo gou pou ékout zistoir, pou rakont zistoir dopi étan pti ziska in zour kan l’èr i ariv pou alé l’ot koté. Mé shttt ! Anon pa parl zordi bann zafèr k’i fash.

L’avé inn foi pou inn bone foi, mésyé lo foi la manz son foi èk in grinn sèl.
In gramoun l’avé troi zanfan-troi garson !- é kan l’èr l’arivé pou alé l’ot koté la vi li l’avé malorozman pa granshoz pou donn son troi zanfan konm éritaz. Kosa li l’avé ? Li l’avé troi zafèr : in kok, in shat épi in pyé sriz-mi koné pa si té in pyé sriz kotlé sansa in n’ot kalité mé tout fason sriz – la sa in bon frui sa. An touléka mi yèm ali é mi pans zot osi zot i yèm sa. Pou partaz lo léritaz té pa nésésèr pass dovan notèr, la partaz a l’amyab. Inn la gingn lo kok, l’ot la pran lo shate, é lo dèrnyé la kontant ali avèk lo pyé sriz.
Promyé garson la kol shomin é li la parti loin, loin mèm ziska in l’androi bizar, demoun téi sava tou lé zour rode solèy an sharète. Koman zot téi fé, mi koné pa, mé i paré zot téi fé. Donk lo promyé garson i ariv dann l’androi bizar-la. Li domann demoun in plas pou ropozé pars téi fé déza près noir. Demoun, zantiy, konm dann bann zistoir la donn ali in plass pou dormi mé la prévienn ali, la di : domin ni lèv bonèr pars i fo ni sava rode solèye bor d’mèr an sharète.
Rod solèy an sharète ? Ala in drol fasonn fèr lé shoz. Moin, pèrsonèl moin néna in zoli zoizo, I apèl kok é kan kok I shant solèye I lèv tousèl. Si zot I vé, dor konm zot I vé, domin matin - mon kok moin la gingn an éritaz va amen solèye pou zot vilaz.. Mal kroiyab in zafèr konmsa ! é zot la prévienn lo marmaye. Marmaye zot la di, si ou i fé mank anou in zourné lé shoz va maltourné pou ou.

Kriké ! Kraké ! Kriké Mésyé ! kraké Madam !
Lo marmaye sir d’li, la di li krin pa arien pars son kok lé abityé fé lèv solèye. Ala in zanimo bien éstraordinèr é tout demoun la aspèr gran matin, an aralan tazantan in pti karang mé avèk la pèr pa oir solèye arivé.
Gran matin, lo kok la shant in kou. Mi koné pa koman li la shanté pars isi nout kok i shant « Ton papa kok ! ton momon poul ». Na d’ot landroi lo kok i fé : « Kokoriko ! » sansa « Kikiriki ! » sansa ankor : « kok dogèl dou ! ». Donk li la shant a son fason é san tardé solèy la komans lové é lo moun lété kontan. San tardé in bèl ron d’fé la komans lèv par dsi la lign lorizon.
Mèrsi zot la di ! Mèrsi pti mésyé ! Lé tèlman éstraordinèr, ni sava oir nout ségnèr konmsa pétète li va ashté out kok épi nou va gingn lévé in èr normal. Lo garson la di : « Akoz pa ! Mi vé bien rankont zot ségnèr sirtou si i pé trouv in l’antant avèk li. »

Promyé morso la fini, morso samdi 18 zilyète-mèrkrodi k’i vien nou va oir dézyèm morso.