L’avé inn foi, pou inn bone foi, mésyé lo foi, la manz son foi èk in grinn sèl.
Ronar la di konmsa : « Monségnèr, mi yèmré in ké an or, pène avèk vré poud an or ». Lo ségnèr la di : « Ronar vik ou l’ammenn bon-bon sriz pou moin, rant aou dann shato, néna in tintiryé va pène out ké. » É sé konmsa lo zanimo madré la gingn sak li voulé, in ké doré. Aprésa, kontann li, li la kol shomin li la parti. An promyé li la parti amenn bann pyès l’or pou lo troizyèm garson é sète-la lété kontan vèye pa koman. Apré li la parti kour-kour in pé dan la natir.
Kan bann pèrdri la vi in ronar la ké pène an l’or, zot la suiv ali a distans. Ronar la romark l’afèr, é momandoné, li la domann bann pèrdri kosa zot téi vé, pou kosa i suiv ali konmsa. In Pèrdri la réponn : « Fash pa mésire Ronar, mé konm ou néna in zoli ké doré, moin épi mon bann sèr, ni domann si ou i pouré pa fé la mèm shoz pou nou. Ronar la di, li pé, a inn kondisyon, sé ké zot i vien avèk li dann shato é la-ba néna in tintiryé va okip de zot bien konm k’i fo. »

Kriké ! Kraké ! Kriké Mésyé ! Kraké Madam !
Bann pèrdri la rant dann shato é bann kizinyé la souk azot pou fé kui. Sé konmsa ké kan l’ariv onzèr lo ségnèr la gingn in bon sirpriz, : pèrdri roti pou manzé. Li la dmann kisa l’amenn sa é banna la fé rant Ronar dan la grann sal lo ségnèr apou manzé. Lo Ségnèr la di : « Ronar kisa la anvoye bon-bon pèrdri pou moin ? ». Lo zanimo la di : « Sé mon mètr, lo marki d’Karaba, la anvoye sa pou ou ! ». Lo ségnèr té étoné, pars dann tan-la, pèrdri l’avé poin in kantité é oila ké toudinkou li gingn plizyèr an mèm tan.
Ronar la di avèk lo ségnèr : « Mon mète néna tout in lélvaz pèrdri dann son bann bitasyon. ».L’èrla lo ségnèr lété kontan é li la done in rékonpans Ronar pou li done son mètr : ankor in foi plizyèr pyèss lor. Ankor in foi li la domann Ronar kosa li vé pou li mèm. Li la réponnr : « Mi yèmré k’i pinn mon kat pate an or, an vré l’or. »

Sinkyèm morso la fini mé lo zistoir la pankor fini-mèrkrodi sink aout m’a rakont azot sizyèm morso-la.